14 студзеня, Мінск /Кар. БЕЛТА/. Беларусы глыбока акунуліся ў працэс абмеркавання галоўнага закона нашай краіны, заявіла журналістам старшыня Савета Рэспублікі Наталля Качанава сёння ў час сустрэчы з грамадзянамі па абмеркаванні праекта Канстытуцыі, перадае карэспандэнт БЕЛТА.
"Разгорнута шырокамаштабная работа па растлумачэнні тых навел, якія прадугледжваюцца ў Асноўным законе краіны. І людзі ўдзячныя за гэта. Я праводзіла сустрэчы ў працоўных калектывах, людзі з удзячнасцю гавораць аб тым, што гэта вельмі важна. Сапраўды, нашы грамадзяне ўключаны ў абмеркаванне праекта Канстытуцыі. І тыя прапановы, якія абмяркоўваюцца сёння на дыялогавых пляцоўках, у грамадскіх прыёмных, працоўных калектывах, - людзям усё гэта цікава, яны разумеюць меру адказнасці за будучыню сваёй краіны. Таму што гэта той закон, па якім давядзецца жыць не аднаму пакаленню, паколькі не так часта даводзіцца мяняць Канстытуцыю, ды гэта і немагчыма", - сказала Наталля Качанава.
Прапаноў ад грамадзян паступіла даволі шмат. "Мы ўчора збіраліся чарговы раз рабочай групай, каб такі прамежкавы зрэз зрабіць, якія прапановы паступаюць ад грамадзян. Таму што ўсё, што паступае, абагульняе Нацыянальны цэнтр прававой інфармацыі. Ужо больш за 5 тыс. прапаноў паступіла ад грамадзян па праекце Канстытуцыі. Вядома, яны структуруюцца, таму што ёсць падобныя. Што ў большай ступені хвалюе грамадзян? У розных катэгорый людзей - абсалютна розныя прапановы. Усе падтрымліваюць, што краіна павінна быць прэзідэнцкай, абавязкова сацыяльна арыентаванай дзяржавай. У гэтым няма ніякага сумнення - пра гэта гавораць усе. Людзі ў большай ступені звяртаюць увагу на сацыяльныя гарантыі. Гэта тое, што мы ўжо заклалі: падтрымка сем'яў, якія выховаюць дзяцей, інвалідаў, пенсіянераў, - падкрэсліла яна. - Людзі, якія глыбока акунуліся ў палітычныя працэсы, юрыдычныя моманты, прыходзяць па пытаннях прыярытэтнасці законаў. Гучаць пытанні па раздзеле "Парламент". Грамадзяне гавораць: можа не трэба пісаць парламент - Нацыянальны сход Беларусі, таму што з'яўляецца Усебеларускі народны сход".
Паводле слоў Наталлі Качанавай, спрэчнае ўспрыманне выклікае артыкул, што грамадзяне павінны клапаціцца аб сваім здароўі. "Узніклі пытанні па арт. 54, што праяўленне патрыятызму і захаванне гістарычнай памяці - абавязак кожнага. Шлюб паміж мужчынам і жанчынай - пра гэта гавораць многія. І я хачу сказаць, што на прыёмы прыходзяць людзі, якія вярнуліся ў Беларусь з іншых краін для таго, каб выратаваць сваіх дзяцей. Не так усё проста і добра ў еўрапейскіх краінах. І каштоўнасці, якія там насаджаюцца, непрымальныя для Беларусі. Яны вярнуліся сюды і хочуць жыць у гэтай краіне. Таму людзі просяць прапісаць пытанні, звязаныя з выхаваннем падрастаючага пакалення ў плане традыцыйных каштоўнасцей", - растлумачыла старшыня Савета Рэспублікі.
Спікер канстатавала: "Людзі сапраўды глыбока акунуліся ў працэс абмеркавання галоўнага закона нашай краіны. І гэта не можа не радаваць, таму што кожны, напэўна, успрымае гэта як сваё асабістае і будучае нашай краіны".
Дарэчы, гэта ўжо другая сустрэча за тыдзень. Пры гэтым жадаючых агучыць свае прапановы спікеру верхняй палаты не становіцца менш. У большасці гэта канструктыўныя прапановы, якія датычацца праекта Канстытуцыі. Разам з тым па-ранейшаму ёсць і тыя, хто просіць дапамогі ў вырашэнні асабістых пытанняў, аж да працаўладкавання. Ні адзін са зваротаў не застаецца без увагі.
Старшы выкладчык Інстытута бізнесу БДУ Аляксандр Папоў застаўся задаволены сустрэчай з Наталляй Качанавай. "Выслухалі вельмі ўважліва, я нават быў уражаны тым, што Наталля Іванаўна запісвае. Адна з маіх прапаноў датычылася змянення арт. 5 Асноўнага закона аб ролі палітычных партый. Я ўнёс прапанову аб тым, што палітычныя партыі павінны выяўляць палітычныя інтарэсы грамадзян і садзейнічаць гэтаму. Яшчэ адна прапанова датычылася складу Усебеларускага народнага сходу. Я ўнёс прапанову, каб у яго склад уваходзілі прадстаўнікі працоўных калектываў, паколькі менавіта там ствараецца ўсё багацце і дабрабыт нашай краіны. Прапановы таксама датычыліся паўнамоцтваў Прэзідэнта і УНС аб прыняцці рашэнняў аб уводзе ўзброеных войскаў або сіл Беларусі за межы рэспублікі", - расказаў ён.
Аляксандр Папоў дадаў: "Прыемна здзіўлены, што сапраўды ўсіх выслухоўваюць, ёсць магчымасць непасрэдна ў Савеце Рэспублікі, спікеру верхняй палаты выкласці сваё меркаванне па жыццёва важных пытаннях для будучага краіны".
З 12.00 да 17.00 сустрэчу з грамадзянамі правядзе старшыня Пастаяннай камісіі па заканадаўстве і дзяржаўным будаўніцтве Савета Рэспублікі, член Канстытуцыйнай камісіі Сяргей Сівец.
17 студзеня сустрэчы з грамадзянамі правядуць: з 11.00 да 14.00 - старшыня Пастаяннай камісіі Савета Рэспублікі па адукацыі, навуцы, культуры і сацыяльным развіцці Віктар Лісковіч, з 14.00 да 17.00 - старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Рачкоў.
У сувязі з вялікай колькасцю жадаючых звярнуцца да членаў Савета Рэспублікі сустрэчы з грамадзянамі будуць праводзіцца па папярэднім запісе. Запіс ажыццяўляецца па тэлефонах: (017) 321-22-98, 327-46-74, 327-46-76.-0-
