9 жніўня, Мінск /Кар. БЕЛТА/. На выбарчыя ўчасткі лепш прыйсці раніцай ці днём. Аб гэтым у эфіры тэлеканала АНТ паведаміла старшыня ЦВК Лідзія Ярмошына, паведамляе БЕЛТА.
Лідзія Ярмошына папрасіла тых, хто яшчэ не прагаласаваў, "не цягнуць з паходам на выбарчы ўчастак". "Ведаю заклікі ўсім прыйсці вечарам і паралізаваць работу ўчастковай выбарчай камісіі", - адзначыла кіраўнік ЦВК. Прагаласаваць, паводле яе слоў, лепш раніцай у спакойнай абстаноўцы ці днём. "А вось вечарам выбаршчыкі могуць проста не трапіць на выбарчы ўчастак. Таму што палітызаваны натоўп, дзеянні якога накіраваны на зрыў выбараў, можа засланіць ім шлях", - лічыць кіраўнік ЦВК.
Яна таксама звярнула ўвагу, што "выбаршчыкаў не могуць апытваць нейкія асобы перад уваходам на выбарчы ўчастак". Апытанні праводзяцца толькі на выхадзе з выбарчага ўчастка. "І тое людзі, якія маюць спецыяльныя пасведчанні. Гэта дзве арганізацыі. Адна заключыла дагавор з тэлекампаніяй "МІР", другая - з СТБ. У іх ёсць дакументы, што пацвярджаюць права на апытанне. Астатнія такога права не маюць", - падкрэсліла Лідзія Ярмошына.-0-
