15 лютага, Мінск /Кар. БЕЛТА/. У турбіннай зале першага энергаблока Беларускай атамнай электрастанцыі адбываецца працэс пераўтварэння цеплавой энергіі ў кінетычную, а затым у электраэнергію. Як выглядае турбіна і наколькі яна надзейная, расказаў начальнік турбіннага цэха Андрэй Лазоўскі ў новым выпуску YouTube-праекта БЕЛТА "Па факце: рашэнні Першага".
Эпіцэнтр выпрацоўкі электраэнергіі на Беларускай атамнай электрастанцыі - турбінная зала першага энергаблока. У гэтым будынку размешчана паравая турбіна магутнасцю 1,2 тыс. МВт і з частатой вярчэння 3 тыс. абаротаў за мінуту. Яе агульная маса без трубаправодаў і кандэнсатара 2,5 тыс. т. Даўжыня агрэгата каля 75 м.
У цэху вельмі цёпла і шумна. Маштабы абсталявання, вядома, уражваюць. Тут адбываецца працэс пераўтварэння цеплавой энергіі ў кінетычную, а затым у электраэнергію, растлумачыў Андрэй Лазоўскі.
"Турбіна настолькі тонка і дакладна адбалансавана, што манета, пастаўленая рабром на фундамент, не ўпадзе", - заявіў ён. А каб мы не сумняваліся ў яго словах, тут жа прадэманстраваў гэта. Андрэй Лазоўскі падышоў да турбіны і паставіў манетку на фундамент. Як і абяцаў начальнік цэха, яна не зрушылася з месца. Толькі ўявіце: агрэгат вагой 2,5 тыс. т робіць 3 тыс. абаротаў за мінуту, а пастаўленая побач на рабро манетка стаіць і не зварухнецца.
Беларуская атамная электрастанцыя пабудавана па расійскім праекце "АЭС-2006". Ён належыць да эвалюцыйных праектаў з вода-вадзянымі рэактарамі трэцяга пакалення. Галоўная іх асаблівасць - унікальнае спалучэнне актыўных і пасіўных сістэм бяспекі. Будынак рэактара ўкрыты двайной ахоўнай абалонкай. Тэхналогія, якая выкарыстоўваецца пры іх будаўніцтве, сёння самая запатрабаваная і апрабаваная ў свеце. З яе выкарыстаннем на працягу апошняга дзесяцігоддзя ўведзены ў эксплуатацыю атамныя станцыі ў Кітаі і Індыі. Таксама плануюцца да ўводу АЭС у Егіпце, Турцыі, Венгрыі, Бангладэш і Узбекістане.
"Беларуская АЭС разлічана і спраектавана з улікам пэўнага набору знешніх фактараў - землетрасенняў, паводак, падзення самалёта і іншага. Тут наш праект адпавядае самым сучасным патрабаванням. Акрамя таго, праект БелАЭС быў і застаецца самым бяспечным па ўсіх сістэмах аховы. Пяць з сямі новых энергаблокаў, якія пачалі будавацца ў мінулым годзе ў свеце, узводзяцца па праекце "АЭС-2006". Гэта ж аб чымсьці сведчыць? Гэты праект сертыфікаваны па ўмовах бяспекі як у МАГАТЭ, так і ў Еўропе. На гэты момант ён самы запатрабаваны ў свеце. Сёння па гэтым праекце будуюцца АЭС у Венгрыі, Бангладэш і Егіпце", - адзначыў намеснік міністра энергетыкі Міхаіл Міхадзюк.-0-
Праект створаны за кошт сродкаў мэтавага збору на вытворчасць нацыянальнага кантэнту.
