27 снежня, Ваўкавыск /Кар. БЕЛТА/. Акцыя "Нашы дзеці" вельмі душэўная і кранальная, яна толькі набірае абароты. Аб гэтым пасля акцыі ў Ваўкавыскім дзіцячым доме заявіў журналістам прэм'ер-міністр Беларусі Раман Галоўчанка, перадае карэспандэнт БЕЛТА.
Гаворачы аб важнасці акцыі "Нашы дзеці" Раман Галоўчанка адзначыў: "Гэтай унікальнай акцыі ў наступным годзе споўніцца 30 гадоў, і ўсе гэтыя гады, можна сказаць, што акцыя "Нашы дзеці" толькі набірае абароты. Напэўна, ужо не засталося ні адной дзіцячай установы, якая б не была ахоплена ўвагай і клопатам розных арганізацый, ад вышэйшых службовых асоб да грамадскіх, валанцёрскіх арганізацый".
Раман Галоўчанка звярнуў увагу, што ў Беларусі актыўна развіваюцца іншыя формы выхавання дзяцей, акрамя ўстаноў інтэрнатнага тыпу: "З 2011 года колькасць такіх устаноў, дзе дзеці знаходзяцца пастаянна, скарацілася ў 2,5 раза. Гэта значыць, актыўна развіваюцца іншыя формы выхавання дзяцей, якія апынуліся ў цяжкай жыццёвай сітуацыі. Гэта дзіцячыя дамы сямейнага тыпу, замяшчальныя сем'і, куды актыўна перадаюцца дзеці. Таму што сямейнае выхаванне для нас з'яўляецца прыярытэтнай формай работы з дзецьмі, якія засталіся без апекі бацькоў, альбо дзецьмі-сіротамі".
Для гасцей свята і выхаванцаў дзіцячага дома быў падрыхтаваны цікавы і добры паказ з сябрамі-снегавікамі, Дзедам Марозам і Снягурачкай. Усе ўспомнілі навагоднія добрыя песні, пакружыліся ў карагодзе і адгадалі загадкі. Спадабаўся паказ шасцігадовай Лізе Сенкявічус. "Мы рыхтаваліся да свята, вучылі песні і выбіралі самыя прыгожыя ўборы. Больш за ўсё мне спадабалася адгадваць загадкі і вадзіць карагод", - падзялілася эмоцыямі яна.
"Новы год - гэта самае галоўнае дзіцячае свята, таму што ўсе чакаюць падарункаў, ёлак, ранішнікаў. Я ўпэўнены, што ва ўсіх дзяцей, дзе б яны ні жылі, на якім кантыненце, у якой краіне, па-мойму, аднолькавыя адчуванні ад гэтага цудоўнага перыяду", - сказаў Раман Галоўчанка, дзелячыся сваімі дзіцячымі ўспамінамі ад навагодніх свят. "Праўда, што снегу было значна больш і можна было і на санках, і на лыжах пакатацца. У апошнія гады надвор'е нас падводзіць, але стараемся не звяртаць на гэта ўвагу, галоўнае, каб у дзяцей была святочная атмасфера", - дадаў прэм'ер-міністр.
"Добра вядомы ўважлівыя адносіны Прэзідэнта краіны да пытанняў клопату пра дзяцей. Тут можна ўспомніць 18-ы дэкрэт кіраўніка дзяржавы аб дадатковых мерах па абароне інтарэсаў дзяцей, - сказаў прэм'ер-міністр. - Самае галоўнае - бяспека дзяцей павінна быць забяспечана безагаворачна".
"Уся краіна хоча зрабіць у перыяд гэтай акцыі, а яна прадоўжыцца да 15 студзеня, максімальна душэўныя, камфортныя ўмовы для дзяцей. Напэўна, ужо цукерак столькі надораць, што іх можна будзе есці ледзь не да лета. Акцыя вельмі душэўная, вельмі кранальная", - дадаў Раман Галоўчанка. Кіраўнік урада падкрэсліў, што акцыя "Нашы дзеці" ідзе ад сэрца.
Традыцыйна не абышлося і без прыемных сюрпрызаў і падарункаў. Раман Галоўчанка ўручыў дырэктару ўстановы адукацыі сертыфікат на Br10 тыс. для ўмацавання матэрыяльна-тэхнічнай базы (сродкі будуць выкарыстаны на пераабсталяванне кулінарнай майстэрні), а хлопчыкам і дзяўчынкам - салодкія падарункі і цацкі. Пасля навагодняга паказу гасцей ветлівыя гаспадары пачаставалі чаем і дамашняй выпечкай. У дзіцячым доме выхоўваюцца 45 дзяцей, большасць - школьнікі (20 з іх - дзеці, якія маюць інваліднасць).-0-
Фота Леаніда Шчаглова
Падпісвайцеся на нас у
