14 красавіка, Мінск /Кар. БЕЛТА/. Па даручэнні кіраўніка дзяржавы Адміністрацыя Прэзідэнта вядзе маніторынг вытворчасці медыцынскіх сродкаў аховы. Аб гэтым журналістам паведаміў кіраўнік Адміністрацыі Прэзідэнта Ігар Сергяенка, які пабываў сёння на ААТ "Элема", перадае карэспандэнт БЕЛТА.
"Па даручэнні кіраўніка дзяржавы Адміністрацыя Прэзідэнта арганізавала маніторынг сітуацыі ў лёгкай прамысловасці. Рэалізуюцца мерапрыемствы па кантролі за вытворчасцю медыцынскіх масак, камбінезонаў і касцюмаў, якія сёння так неабходны медыцынскім работнікам", - адзначыў Ігар Сергяенка.
Кіраўнік Адміністрацыі Прэзідэнта падзяліўся ўражаннямі ад убачанага на "Элеме". "Калектыў мабілізаваны на гэту работу. Працуюць не толькі швачкі, але і інжынерна-тэхнічны склад. Літаральна з 3 красавіка кіраўніцтва прадпрыемства без усялякіх указанняў прыняло рашэнне арганізаваць выпуск гэтай прадукцыі. Сёння яны ўжо выходзяць на вытворчасць 50 тыс. масак і 1 тыс. касцюмаў за дзень", - расказаў ён.
"Кіраўніцтва прадпрыемства прыкладае ўсе намаганні, каб стварыць нармальныя ўмовы, каб максімальна хутка, якасна арганізаваць выпуск прадукцыі і забяспечыць як аптэкі, так і ўстановы аховы здароўя", - падкрэсліў Ігар Сергяенка.
ААТ "Элема" вырабляе чатырохслаёвыя медыцынскія маскі, ахоўныя камбінезоны і халаты з беларускага спанбелу. Уся выпушчаная прадукцыя дзень у дзень размяркоўваецца па папярэдніх заяўках. У рабоце іх пастаянна знаходзіцца каля 30. Задзейнічаны чатыры швейныя цэхі і адзін раскройны. На "Элеме" цалкам перайшлі на вытворчасць медыцынскіх сродкаў аховы, каб задавольваць патрэбы Мінска. Як растлумачыў дырэктар прадпрыемства Анатоль Венядзіктаў, выпускаць адзін від прадукцыі - гэта найбольш мэтазгодны варыянт для паточнай вытворчасці "Элемы". Уся калекцыя адзення была пашыта загадзя, яна на складзе, адгружаецца ў магазіны. Праблем з гэтым ніякіх няма.-0-
