12 снежня, Мінск /Кар. БЕЛТА/. Старшыня таварыства ўласнікаў жылля "Каштан - КІЗ" (Магілёў) Сяргей Самсонаў у выпуску праекта "Краіна гаворыць" на YouTube-канале БЕЛТА расказаў аб спецыфіцы работы кіраўніком ТУЖ.
"Эфектыўнасць функцыянавання таварыства ўласнікаў жылля (ТУЖ) на 90 працэнтаў залежыць ад яго старшыні. Сёлета ў Магілёве пайшла тэндэнцыя, калі людзі стамляюцца ад старшынь, якія бяздзейнічаюць. У такіх выпадках, калі не могуць выбраць новага кіраўніка, назначаецца ўпаўнаважаная асоба. Гэта працэдура прапісана ў Жыллёвым кодэксе - праводзіцца конкурс або абслугоўванне на сябе бярэ тэрытарыяльнае ЖЭУ", - адзначыў Сяргей Самсонаў.
Старшыня ТУЖ расказаў, што працуе на гэтай пасадзе з 2016 года і ў яго веданні знаходзяцца дзевяць дамоў, тры з якіх знаходзяцца на поўным самаабслугоўванні. "Нягледзячы на тое, што ў кожным пад'ездзе гэтых дамоў вывешаны інфастэнды, дзе ёсць усе неабходныя нумары (і сантэхнікаў, і электрыкаў, і інжынераў), мой тэлефон даступны 24/7. Па часе няма ў мяне практычна ні выхадных, ні свят. Калі ж я ў водпуску, напрыклад, у нас ёсць яшчэ адзін нумар - намесніка старшыні", - праінфармаваў ён.
Сяргей Самсонаў прызнаўся, што ведае ўсіх сваіх жыльцоў у твар, таксама як і яны свайго старшыню. "Жыхары тэлефануюць - прыязджаеш, размаўляеш з імі. Напрыклад, тыя ж акты заліцця, калі сусед суседа заліў, - я сам прыязджаю і складаю і акт заліцця, і дэфектны акт. Акрамя таго, мы ў адпаведнасці з законам абавязаны штогод 31 мая збіраць агульны сход уласнікаў ", - канстатаваў старшыня ТУЖ.
Кантроль выканання работ таксама ўскладзены на кіраўніка таварыства. "Я кантралюю ўсё тымі ж аб'ездамі, гляджу як прыбрана, напрыклад. Дворнікі ў мяне фотавыяву прысылаюць праз вайбер, інакш кажучы, прыбралі яны пазаўчора ад снегу адзін аб'ект - прысылаюць фатаграфію. Я правяраю, ці ўсё акуратна зроблена. Тут зноў жа ўсё залежыць ад старшыні. Калі наймаеш работніка, ты разумееш, што за рамкі кошту таго ж прыбірання месцаў агульнага карыстання вылазіць нельга, ёсць тарыф. Асноўная задача - знайсці чалавека, які будзе адказна ставіцца да сваёй работы, не п'янстваваць, а захоўваць графік прыбірання. У нас за апошнія года паўтара ніводнай скаргі па прыбіранне не было", - рэзюмаваў Сяргей Самсонаў.
Праект створаны за кошт сродкаў мэтавага збору на вытворчасць нацыянальнага кантэнту.-0-
