20 студзеня, Мінск /Кар. БЕЛТА/. Урач агульнай практыкі 11-й гарадской паліклінікі Мінска Карына Пстыга, якая адна з першых зрабіла прышчэпку ад COVID-19, расказала карэспандэнту БЕЛТА, чаму вырашыла вакцынавацца.
Карына Пстыга адзначыла: такое рашэнне прыняла з улікам эпідэміялагічнай сітуацыі па COVID-19. Гэта было звязана і з тым, што яна працуе ў інфекцыйным блоку паліклінікі (а сюды звяртаецца вельмі шмат пацыентаў з прыкметамі вострых рэспіраторных вірусных інфекцый), уваходзіць у кантактную групу, якая назірае за хворымі на COVID-19 і кантактамі першага ўзроўню дома.
Перад вакцынацыяй медыка, якая ў гэтай сітуацыі выступала пацыентам, агледзеў урач агульнай практыкі. Былі памераны тэмпература, ціск, сатурацыя, ацэнены агульны стан. Пасля прышчэпкі на працягу 30 хвілін за жанчынай назіралі ўрачы. "Усё прайшло даволі лёгка, самаадчуванне не змянілася. Атрымала прышчэпку і пайшла далей працаваць", - расказала Карына Пстыга.
Адносна хвалявання наконт вакцынавання яна адказала, што не перажывала. "Больш баімся самой інфекцыі", - прызналася медык. Тым больш вакцына распрацавана расійскімі вучонымі, прайшла клінічныя выпрабаванні і праверку.
Урач лічыць, што падумаць аб вакцынаванні трэба, асабліва тым, хто знаходзіцца ў групе рызыкі па розных захворваннях, у прыватнасці сардэчна-сасудзістых, органаў дыхання, а таксама пажылым людзям, тым, хто часта наведвае грамадскія месцы. У вакцыны ёсць і проціпаказанні: вострыя інфекцыйныя і неінфекцыйныя захворванні ў вострай фазе, абвастрэнне хранічных хвароб, кантакты з хворым або чалавекам, які падазрае ў сябе захворванне (калі яны былі менш як за 14 дзён да прышчэпкі), цяжарнасць.
Як паведамлялася, 19 студзеня пачалася вакцынацыя медработнікаў Беларусі, якія знаходзяцца ў зоне рызыкі. Перш за ўсё будуць прышчэплены 2285 медработнікаў Мінска, 3460 - Брэсцкай вобласці, 3260 - Віцебскай вобласці, 4365 - Гомельскай вобласці, 1735 - Гродзенскай вобласці, 1610 - Магілёўскай вобласці, 2485 - Мінскай вобласці. Каля 800 доз - для медработнікаў рэспубліканскіх устаноў.
У Мінску 11-я паліклініка вызначана пунктам вакцынацыі для жыхароў Ленінскага раёна. На першым этапе прышчэпкі зробяць медработнікі, а потым работнікі ўстаноў адукацыі. Выказалі жаданне прышчапіцца 30 медработнікаў паліклінікі, 19 студзеня вакцынаваны 10 чалавек. "Я думаю, гэта колькасць з кожным днём будзе павялічвацца", - дадала Карына Пстыга.-0-
