21 кастрычніка, Мінск /Кар. БЕЛТА/. Умовы рэалізацыі інвестпраекта па будаўніцтве комплексу "Мінск-Мір" будуць удасканалены, паведамілі БЕЛТА ў прэс-службе беларускага лідара.
Гэта прадугледжана ўказам нумар 370, які падпісаў 20 кастрычніка Прэзідэнт Беларусі Аляксандр Лукашэнка. Дакументам карэкціруецца ўказ ад 22 верасня 2014 года нумар 456 "Аб рэалізацыі інвестыцыйнага праекта "Эксперыментальны шматфункцыянальны комплекс "Мінск-Мір".
Для забеспячэння своечасовага завяршэння будаўніцтва гэтага комплексу ўказам удасканальваюцца ўмовы рэалізацыі інвестыцыйнага праекта, у тым ліку заказчыку комплексу прадастаўляецца шэраг правоў. У прыватнасці, права на распрацоўку праектнай дакументацыі на аб'екты, якія ўваходзяць у склад комплексу (праект забудовы чаргі, квартала, асобных будынкаў), а таксама на яе зацвярджэнне і ўнясенне ў яе змяненняў без карэкціроўкі ўсяго горадабудаўнічага праекта дэталёвага планавання (для скарачэння часу распрацоўкі праектнай дакументацыі).
Акрамя таго, прадастаўляецца права на вызначэнне кошту аб'ектаў долевага будаўніцтва на падставе фактычна панесеных затрат; часовая канфіскацыя і выкарыстанне на бязвыплатнай аснове для патрэб будаўніцтва будынкаў і збудаванняў, якія размешчаны на тэрыторыі комплексу і падлягаюць зносу; стварэнне юрыдычнай асобы (кіруючай арганізацыі), якая ажыццяўляе эксплуатацыю агульнай маёмасці сумеснага домаўладання будынкаў, што ўваходзяць у комплекс, і яе абслугоўванне.
Указам таксама прадугледжана захаванне будынка РУП "Белаэранавігацыя", які размешчаны на тэрыторыі комплексу і раней падпадаў пад знос.-0-
