7 верасня, Мінск /Кар. БЕЛТА/. У Беларусі ўдасканальваецца прававое рэгуляванне пры ажыццяўленні адміністрацыйных працэдур. Яны актуалізуюцца і спрашчаюцца ў адпаведнасці з даручэннем Прэзідэнта Беларусі. Адпаведны ўказ нумар 311, які прадугледжвае змяненне ранейшых указаў, Аляксандр Лукашэнка падпісаў 6 верасня, паведамілі БЕЛТА ў прэс-службе кіраўніка дзяржавы.
У прыватнасці, уносяцца змяненні ва ўказы Прэзідэнта Беларусі ад 26 красавіка 2010 г. нумар 200 "Аб адміністрацыйных працэдурах, якія ажыццяўляюцца дзяржаўнымі органамі і іншымі арганізацыямі па заявах грамадзян", ад 12 мая 2017 г. нумар 166 "Аб удасканаленні спецыяльнага прававога рэжыму Кітайска-беларускага індустрыяльнага парка "Вялікі камень".
Дакумент прадугледжвае карэкціроўку больш як 300 адміністрацыйных працэдур з улікам практыкі іх ажыццяўлення, а таксама змяненняў заканадаўства.
Напрыклад, указам прадугледжваецца адмова ад спагнання платы за дазвол перапланіроўкі жылога памяшкання, узгадненне самавольнай перабудовы, перавод жылога памяшкання ў нежылое, а таксама скарачаюцца тэрміны выканання працэдур, звязаных з выдачай іншаземцам дазволаў на пастаяннае пражыванне ў Рэспубліцы Беларусь.
Актам замацоўваюцца новыя адміністрацыйныя працэдуры, неабходныя для рэалізацыі грамадзянамі сваіх правоў (напрыклад, выдача пасведчанняў аб прысваенні кваліфікацыі судовага эксперта, рашэння аб прадастаўленні бясплатна адной спробы экстракарпаральнага апладнення).
У адпаведнасці з указам таксама выключаецца паўнамоцтва дзяржаўнай установы "Адміністрацыя Кітайска-беларускага індустрыяльнага парка "Вялікі камень" па прадаўжэнні тэрміну дзеяння дазволу на адкрыццё прадстаўніцтваў замежнай арганізацыі на тэрыторыі парка (такі дазвол будзе выдавацца бестэрмінова).-0-
