8 жніўня, Мёрскі раён /Кар. БЕЛТА/. Прэзідэнт Беларусі Аляксандр Лукашэнка наведвае завод па вытворчасці металічнага ліста і белай бляхі ТАА "ММПЗ-груп", паведамляе БЕЛТА.
Кіраўнік дзяржавы заслухае даклад аб стане спраў на прадпрыемстве і прынятых мерах па забеспячэнні яго ўстойлівай работы, а таксама азнаёміцца з выставай узораў вырабляемай прадукцыі і лініямі вытворчасці лістапракатнага цэха.
Завод па вытворчасці металічнага ліста і белай бляхі ў Мёрах - адзіны вытворца бляхі электралітычнага луджэння і халоднакатанага ліста ў Беларусі. Ён уведзены ў эксплуатацыю ў канцы 2020 года. Белая бляха, якую тут могуць вырабляць у аб'ёме да 150 тыс. т у год, прымяняецца для ўпакоўкі ў харчовай, парфумернай, лакафарбавай прамысловасці і іншых сферах.
Ключавым інвестарам праекта з заяўленым аб'ёмам фінансавання больш за 380 млн еўра выступіла аўстрыйская кампанія. Беларуская дзяржава на першапачатковым этапе ўдзельнічала толькі ў стварэнні інфраструктуры да яго. Аднак у выніку эканамічных пралікаў, дапушчаных уласнікам, а таксама элементаў дзелавой неахайнасці ў прадпрыемства ўзніклі сур'ёзныя праблемы з абслугоўваннем крэдыту. Тэрміны ўводу завода ў эксплуатацыю неаднаразова працягваліся, павялічыліся капітальныя выдаткі. Інвестар не поўнасцю выканаў свае фінансавыя абавязацельствы. Гэта істотна паўплывала на паказчыкі эфектыўнасці праекта, значна ўзраслі рыскі. "Атрымалі прыбытку каля Br90 млн (па выніках 2021-га. - Заўвага БЕЛТА), што амаль у 10 разоў менш, чым было запланавана, - растлумачыў журналістам пры наведванні завода віцэ-прэм'ер Юрый Назараў. - Па сутнасці, са жніўня мінулага года завод спыніўся. За мінулы год сфарміравалася амаль $400 млн незваротных сродкаў крэдыторам. І паўстала пытанне, што рабіць з заводам, аналагаў якому няма на постсавецкай прасторы. Ёсць у Расіі і Казахстане, але там тэхналогіі не тыя, гэта самы сучасны завод".
Беларусбанк, які з'яўляецца адным з асноўных крэдытораў, даваў адтэрміноўку па выплаце часткі працэнтаў, рэфінансаваў кароткатэрміновыя абавязацельствы даўжніка, якія ўзнікалі ў ходзе работы, фінансаваў закупку дапаможнага абсталявання, а аб'ём крэдытнай падтрымкі павялічыўся больш як у 2 разы да запланаванага. У маі 2022 года банк вымушаны быў пачаць прымусовае спагнанне запазычанасці.
У цяжкай для завода сітуацыі дзяржава прыняла рашэнне не пакідаць прадпрыемства без падтрымкі, тым больш што тут працуюць амаль 670 чалавек і буйнейшага прамысловага аб'екта на тэрыторыі раёна няма. Сітуацыя на ММПЗ неаднаразова станавілася прадметам сур'ёзнага абмеркавання на ўзроўні Прэзідэнта і ўрада. "Прадпрыемства будзе жыць. Мы будзем адказваць за тое, каб гэта прадпрыемства працавала, захоўвала працоўныя месцы і выйшла на тыя параметры, якія дазволілі б яму выконваць свае абавязацельствы перад крэдыторамі, - гаварыў журналістам прэм'ер-міністр Раман Галоўчанка па выніках нарады Прэзідэнта з кіраўніцтвам Савета Міністраў. - Урадам схема выпрацавана, Прэзідэнтам яна падтрымана. Гэта дакладны набор дзеянняў".
Так, тэрыторыю завода ўключылі ў СЭЗ "Віцебск", каб мінімізаваць падаткі. Для яго ўстанавілі льготныя тарыфы на электраэнергію і газ. Адкрылі спецыяльны рахунак, на якім збіраліся сродкі на выплату зарплаты, каб крэдыторы не наклалі арышт на яго і не спынілі перамяшчэнне сродкаў. "Таксама было прынята рашэнне загружаць завод сыравінай у давальніцкім рэжыме. Мы вызначылі кіруючую кампанію, якую надзялілі крэдытнымі рэсурсамі пад гарантыю ўрада і якая забяспечыла закупку сыравіны і расходных матэрыялаў, каб забяспечыць пачатак вытворча-тэхнічнага працэсу. У красавіку завод даў 200 т белай бляхі, у маі 1,4 тыс. т, а паказчыкі ліпеня набліжаюцца да 5 тыс. т, - інфармаваў Юрый Назараў. - Вядома, хацелася б ісці з больш хуткай дынамікай. Гэта прадпрыемства бесперапыннага цыкла вытворчасці, і яго спыніць і запусціць вельмі дорага, да таго ж гэта вялікая нагрузка на абсталяванне. І ў чэрвені на такую тэхналогію завод выйшаў. У ліпені кіруючая кампанія сустрэлася тут з прадстаўнікамі расійскай "Поўначсталі" і дамовілася на вельмі добрых умовах па пастаўках сыравіны на Мёрскі завод да канца года. Мы закупім амаль 50 тыс. т металу ў гэтай кампаніі, і гэтага будзе дастаткова, каб забяспечыць тут бесперапынны цыкл вытворчасці".
Што датычыцца збыту прадукцыі, то першапачаткова быў разлік на пастаўкі ў краіны Еўрасаюза. Пасля ўвядзення санкцый гэты напрамак закрыўся. "Цяпер глядзім унутраны рынак, дзе ў нас ёсць два буйныя спажыўцы - Рагачоўскі і Глыбоцкі малочнакансервавыя камбінаты, якія выкарыстоўваюць бляшаную ўпакоўку, і расійскі рынак. І глядзім упэўнена. Гэты завод выпускае белую бляху той таўшчыні, якую не вырабляе ні адзін іншы завод. Мы знойдзем свайго спажыўца. І нядаўна на мёрскім прадпрыемстве з расійскіх рэгіёнаў пабывалі два гаспадары буйных тарных камбінатаў, якіх цалкам задавольвае гэта прадукцыя. Баючыся санкцый, яны паспелі ўзяць сабе прадукцыю еўрапейскага вытворцы, але, калі прыехалі сюды, падпісалі доўгатэрміновы кантракт", - расказаў Юрый Назараў.
Ён дадаў, што рашэннем Гаспадарчага суда Віцебскай вобласці 12 ліпеня тут уведзена конкурсная вытворчасць, і з гэтай даты на заводзе ўведзены ахоўны перыяд у адносінах да юрыдычнай асобы. "Такое рашэнне было прынята, каб завод стаў на ногі, раскруціўся. І задача прадпрыемства - выйсці да канца года на перапрацоўку мінімум 8-9 тыс. т за месяц і на прыбытковую работу", - растлумачыў віцэ-прэм'ер.-0-
