23 кастрычніка, Слуцкі раён /Кар. БЕЛТА/. Прэзідэнт Беларусі Аляксандр Лукашэнка робіць сёння рабочую паездку ў Слуцкі раён Мінскай вобласці, паведамляе БЕЛТА.
Кіраўнік дзяржавы знаёміцца з ходам уборачнай кампаніі ў цэлым па краіне і ў рэгіёне ў прыватнасці. Размова ідзе ў тым ліку пра арганізацыю ўборкі кукурузы.
Прэзідэнт наведае сельскагаспадарчы філіял ААТ "Слуцкі сыраробны камбінат" і МТК "Ванькоўшчына", дзе яму даложаць аб новых падыходах да будаўніцтва малочнатаварных комплексаў у Мінскай вобласці.
Сельгасарганізацыі Мінскай вобласці плануюць пабудаваць у 2021 годзе 17 малочнатаварных комплексаў магутнасцю не менш як 800 галоў дойнага статка. Гэта плануецца зрабіць па інвестыцыйнай праграме з дзяржпадтрымкай. Фінансавацца будаўніцтва аб'ектаў будзе роўнымі долямі з абласнога і рэспубліканскага бюджэтаў. Даільна-малочнае абсталяванне і халадзільнікі будуць набывацца на ўмовах лізінгу праз ААТ "Прамагралізінг". Будаўніча-мантажныя работы і завяршэнне работ на аб'ектах будуць праводзіць сельгасарганізацыі за кошт уласных сродкаў.
Побач з існуючымі комплексамі плануецца ўзводзіць новыя памяшканні для ўтрымання дойнага статка і даільна-малочны блок. А старыя памяшканні - рэканструяваць для ўтрымання часткі кароў і маладняку. Сродкі на ўзвядзенне МТК плануецца сэканоміць, знізіўшы затраты на будаўніцтва інжынернай і транспартнай інфраструктуры, сіласна-сянажных траншаў, памяшканняў для гадоўлі маладняку.
Што датычыцца ўраджаю кукурузы, у гэтым годзе ў Беларусі павялічаны плошчы пасеву, узрасце, адпаведна, і вытворчасць зерня кукурузы на кармавыя мэты. У сярэднім за апошнія пяць гадоў яго сярэднегадавы аб'ём быў 865 тыс. т, а ў гэтым годзе чакаецца не менш як 1,3 млн т зерня кукурузы.
Акрамя таго, дзякуючы рэалізацыі інвестыцыйных праектаў па будаўніцтве кукурузакалібровачных заводаў у гэтым годзе 52 працэнты пасеваў кукурузы ў краіне высеяны айчыннымі гібрыдамі.-0-
