9 жніўня, Мінск /Кар. БЕЛТА/. Аляксандр Лукашэнка лічыць магчымым стварэнне Беларуссю і Расіяй агульнай базы экстрэмісцкіх сайтаў. Такое меркаванне беларускі лідар выказаў сёння ў час "Вялікай размовы з Прэзідэнтам", перадае карэспандэнт БЕЛТА.
З такой ідэяй да Аляксандра Лукашэнкі звярнуўся блогер Ілья Бягун. "У Расіі, як і ў Беларусі, ёсць спісы забароненых матэрыялаў, сайтаў, у тым ліку - экстрэмісцкіх. Расійская Федэрацыя - значна большая. І інфармацыйны парадак дня, які фарміруецца ў Расіі, вельмі моцна ўплывае на меркаванне людзей у адносінах да Беларусі. Мы праходзім этап фарміравання Саюзнай дзяржавы. І калі гаварыць аб парытэтных пачатках у гэтым саюзе, магчыма, было б рацыянальным прызнанне гэтых спісаў і магчымасці іх рэдактаваць. Гэта дасць дадатковы элемент кантролю над расійскім парадкам дня тых медыярэсурсаў, якія праз год пасля падзей 2020 года сталі прызнаваць экстрэмісцкімі. Але на гэта спатрэбіўся цэлы год - гэта складаны і доўгі механізм", - падкрэсліў блогер.
Як адзначыў Аляксандр Лукашэнка, гэта пытанне абмяркоўвалася з Уладзімірам Пуціным. "У гэтым напрамку складана працаваць, але тут таксама прымем рашэнні. Мы абмяркоўвалі гэта пытанне з Уладзімірам Уладзіміравічам. І яны працуюць у гэтым напрамку", - сказаў беларускі лідар.
Прэзідэнт лічыць, што ў гэтым пытанні магчыма каардынацыя, паколькі ў Беларусі і Расіі ўжо ёсць агульная база адносна тых, каму забаронены ўезд на тэрыторыю дзвюх краін. "У асноўным гэта расійскія грамадзяне. Яны на кантролі і ў нас. Чаму ў гэтым пытанні не можа быць гэтак жа?" - адзначыў Аляксандр Лукашэнка.-0-
