10 лютага, Мінск /Кар. БЕЛТА/. Ігар Брыло назначаны міністрам сельскай гаспадаркі і харчавання Беларусі. Адпаведнае кадравае рашэнне прыняў сёння Прэзідэнт Беларусі Аляксандр Лукашэнка, перадае карэспандэнт БЕЛТА.
Да гэтага часу Ігар Брыло працаваў у гэтым ведамстве на пасадзе першага намесніка міністра.
Кіраўнік дзяржавы адзначыў, што Ігар Брыло прыжыўся ўжо ў ведамстве, ведае сельскую гаспадарку, разумее правільна, у тым ліку ідэалагічна. "Ну і міністэрства няпростае. Таму я буду вельмі рады, калі, Ігар Вячаслававіч, у цябе атрымаецца работа кіраўніком".
"Толькі ні пад каго не падладжвайся. У нас губернатары - "кіты" моцныя, вельмі моцныя. Цяпер губернатарскі корпус як ніколі моцны. Але гэта не значыць... Табе з ім (з тым ці іншым губернатарам. - Заўвага БЕЛТА) давядзецца перш за ўсё працаваць, дзяліць паўнамоцтвы і адказнасць. Ты гэта ўжо вельмі добра ведаеш - што тваё, што іх, - параіў Прэзідэнт. - Таму патрабаванні павінны быць прынцыповымі і строгімі. У тым ліку і да Івана Іванавіча Крупко (нядаўна назначаны старшынёй Гомельскага аблвыканкама. - Заўвага БЕЛТА), нягледзячы на тое, што ён быў міністрам сельскай гаспадаркі, а ты ў яго быў намеснікам".
Аляксандр Лукашэнка таксама выказаўся наконт асабістых якасцей новага міністра. "Асабіста я некалькі разоў спрабаваў цябе праверыць, скажу шчыра. Я не знайшоў па сваіх крытэрыях нейкіх недахопаў на сённяшні дзень", - сказаў ён.-0-
