Сцяг Аўторак, 19 сакавіка 2024
Усе навіны
Усе навіны
Прэзідэнт
22 кастрычніка 2021, 12:05

Аб абароне персанальных даных, электрамабілях, пандэміі, росце цэн і фэйках. Лукашэнка сабраў нараду з кіраўніцтвам Саўміна

22 кастрычніка, Мінск /Кар. БЕЛТА/. Прэзідэнт Беларусі Аляксандр Лукашэнка сабраў нараду з кіраўніцтвам Савета Міністраў, на якую вынесены разнапланавыя пытанні, перадае карэспандэнт БЕЛТА.

"Нягледзячы на тое, што яны разнапланавыя, іх аб'ядноўвае адно - нацэленасць на рашэнне актуальных праблем жыцця нашага грамадства", - падкрэсліў беларускі лідар.

Аб абароне персанальных даных

Кіраўнік дзяржавы нагадаў, што ў маі бягучага года быў прыняты закон, які накіраваны на забеспячэнне і абарону правоў грамадзян пры апрацоўцы іх персанальных даных. "Як лічаць урад і Аператыўна-аналітычны цэнтр, для практычнай рэалізацыі закона і належнага кантролю ў гэтай сферы неабходна стварыць асобную структуру", - адзначыў Аляксандр Лукашэнка.

Ён запатрабаваў далажыць аб выніках усебаковай прапрацоўкі гэтага пытання: якія варыянты вывучаліся і што прапануецца зрабіць у гэтым напрамку, таксама з улікам міжнароднай практыкі. "І самае галоўнае - нашы магчымасці", - заўважыў Прэзідэнт.

"Чаму не разглядаецца пытанне ўскладання функцый па абароне персанальных даных на адзін з існуючых у краіне органаў?" - паставіў пытанне кіраўнік дзяржавы.

Аб электрамабілях

Аляксандр Лукашэнка ставіць задачу пашырыць выкарыстанне ў Беларусі электратранспарту. Ён падкрэсліў, што гэта адзін з найбольш перспектыўных напрамкаў. "Сусветная практыка паказвае, што курс на развіццё і апераджальнае ўкараненне інфраструктуры да яго (электратранспарту. - Заўвага БЕЛТА) быў правільным. Сёння ўжо практычна ўсе краіны ідуць гэтым шляхам. Гэта пільная неабходнасць і для нас - як з пазіцыі адсутнасці дастатковых аб'ёмаў уласнай нафты, так і з улікам запуску Беларускай АЭС", - сказаў ён.

Акрамя толькі эканамічных аспектаў, немалаважна і экалагічнае вымярэнне гэтай праблемы, а таму спыняцца ў стварэнні належных умоў функцыянавання гэтай новай сферы нельга ні ў якім выпадку, адзначыў Прэзідэнт.

Амаль год таму было прынята рашэнне аб прадастаўленні шэрага льгот для павышэння зацікаўленасці насельніцтва ў набыцці легкавых электрамабіляў. Як лічыць урад, гэта практыка сябе апраўдала. "Цяпер наспела неабходнасць увядзення дадатковых стымулаў", - заявіў Аляксандр Лукашэнка.

Перад удзельнікамі нарады ён паставіў шэраг пытанняў: ці дазволяць гэтыя стымулы, што прапануюцца, актыўней аснашчаць паркі электратранспартам як для пасажырскіх, так і камерцыйных перавозак, ці зробяць яны гэту тэхніку больш даступнай для грамадзян і бізнесу?

"Акрамя таго, нельга забываць пра інфраструктуру. На заправачных станцыях па ўсёй рэспубліцы павінна быць магчымасць хуткай зарадкі легкавых электрамабіляў. На сённяшні дзень толькі каля 10 працэнтаў АЗС прадастаўляюць такую ​​паслугу. Трэба значна больш. Мы нядаўна гаварылі з чалавекам, які за гэта адказвае, - кіраўнік "Беларуснафты". Задача перад ім пастаўлена, усе пытанні вырашаны, нічога больш яго не стрымлівае, каб нарошчваць такія магутнасці. Тым больш што неабходнае абсталяванне для гэтага Беларусь вырабляе поўнасцю. Хацеў бы атрымаць больш дакладныя ацэнкі чаканых вынікаў прапанаваных у гэтым напрамку рашэнняў", - сказаў Аляксандр Лукашэнка.

Аб актуалізацыі асобных актаў кіраўніка дзяржавы

На нараду таксама вынесена пытанне аб актуалізацыі асобных актаў кіраўніка дзяржавы з улікам новых кодэксаў аб адміністрацыйнай адказнасці, а таксама закона па пытаннях сацыяльных нарматываў і мінімальнай заработнай платы.

Плануецца замяніць такі індыкатар, як велічыня мінімальнага спажывецкага бюджэту, на велічыню бюджэту пражытачнага мінімуму. "Ці не атрымаецца, што з-за тэхнічных правак перастануць працаваць даўно наладжаныя механізмы? Вось гэтага дапусціць нельга", - сказаў беларускі лідар.

Аб рэалізацыі інвестпраектаў

Адной з тэм нарады стала рэалізацыя некаторых інвестыцыйных праектаў. "Паступаючая мне інфармацыя па рэалізацыі шэрага інвестыцыйных праектаў выклікае занепакоенасць. Мы не можам сарваць устаноўленыя тэрміны, таму што гэта значныя фінансава-эканамічныя страты. А сёння як ніколі на рахунку кожная капейка", - звярнуў увагу Прэзідэнт.

Для ўсебаковага разгляду абазначанага пытання на нараду да кіраўніка дзяржавы былі запрошаны адпаведныя службовыя асобы, якія ў час сваёй работы ва ўрадзе і на іншых пасадах курыравалі многія з інвестпраектаў.

"Разам з тым лічу, што шэраг пытанняў мог бы быць вырашаны і без увагі кіраўніка дзяржавы, прытым што ў нас ёсць больш надзённыя і нават неадкладныя праблемы. Размова перш за ўсё ідзе пра барацьбу з пандэміяй, якая прадаўжаецца", - сказаў Аляксандр Лукашэнка.

Аб росце цэн і даходах насельніцтва

Асобны акцэнт на нарадзе кіраўнік дзяржавы зрабіў на задачы па стрымліванні росту цэн. "Мы падыходзім да зімовага перыяду, і, акрамя проціэпідэмічных пытанняў, стаіць задача стрымлівання росту цэн, каб яны не перавышалі прымальны для насельніцтва ўзровень. Асабліва гэта датычыцца кошту прадуктаў харчавання", - удакладніў Прэзідэнт.

Ён адзначыў, што пытанне росту цэн вельмі значнае для насельніцтва. "Пытанне пытанняў. Ёсць каму гэтым займацца. Займайцеся. Каб не было потым нейкіх непрыемных размоў на гэту тэму", - звярнуўся да прысутных Прэзідэнт.

"Ёсць тэма, і вельмі важная, і яна правільная, якую ўзнімаюць людзі, - суадносіны росту цэн і даходаў насельніцтва. Людзям усё роўна, якія будуць цэны ў магазіне. Былі б грошы ў кішэні, каб па гэтых цэнах набыць тавар. І вось гэтыя прапорцыю і баланс трэба падтрымліваць што б там ні было", - падкрэсліў кіраўнік дзяржавы.

На яго думку, трэба больш актыўна растлумачваць людзям, што цэны на тавары і паслугі ўзаемазвязаны з фінансавым станам прадпрыемстваў, ад якога ў сваю чаргу залежыць дастатак работнікаў. "Рост цэн на нейкія тавары - гэта перш за ўсё дабрабыт тых калектываў, якія вырабляюць гэтыя тавары", - звярнуў увагу беларускі лідар.

"Калі на трактар расце цана, то больш грошай атрымлівае трактарны завод, працоўны калектыў. Але сялянам, прабачце мне, усё роўна, што там лепш жыве працоўны калектыў МТЗ. Яны заўсёды скардзяцца, што расце цана на трактар. Або ж на злобу дня - рост цэн на прадукты харчавання. Гараджан не цікавіць, і яны не радуюцца ад таго, што, калі цэны на бульбу або яшчэ нешта выраслі, то сяляне атрымалі хоць невялікую прыбаўку да сваёй заработнай платы, а калгасы і саўгасы, па-старому кажучы, атрымалі дадатковы заработак. Гараджан гэта не цікавіць, і людзі так не думаюць, - растлумачыў Прэзідэнт. - Трэба людзям гэта тлумачыць".

Аб уборцы ўраджаю і запасах на зіму

"Нараўне з прыняццем антыінфляцыйных мер павінен быць наведзены парадак там, дзе пачынаецца эканоміка галіны, што забяспечвае харчовую бяспеку. Тыя тэндэнцыі, якія я бачу ў агракомплексе, часам насцярожваюць. Хоць дзяржава падставіла плячо па ўсіх напрамках, дзе толькі патрабавалася гэта падтрымка і дзе яе прасілі " - сказаў на нарадзе Аляксандр Лукашэнка.

Кіраўнік дзяржавы канстатаваў, што ўборка ўраджаю ўжо ў цэлым завершана. Застаецца яшчэ нарыхтоўка кукурузы на зерне, і Прэзідэнт запатрабаваў актывізаваць гэту работу, завяршыўшы яе ў бліжэйшы час, пакуль нядрэннае надвор'е.

"Я бачу, што мы атрымліваем добрыя дадатковыя мільёны, тысячы тон збожжа, якіх нам не хапае. І па выніках года мы можам выйсці на вытворчасць усіх відаў збожжа звыш 9 млн т. Вядома, гэта не 10 млн т мінулагодніх, але 9 млн т - гэта цалкам прымальны аб'ём, які забяспечыць поўнасцю патрэбнасці нашай дзяржавы", - падкрэсліў беларускі лідар.

Асобна Аляксандр Лукашэнка пацікавіўся, як ідуць справы з закладкай стабілізацыйных фондаў: "Вось тут я вас, кіраўнікоў усіх узроўняў, катэгарычна папярэджваю: гэтыя стабілізацыйныя фонды мы з савецкіх часоў выкарыстоўваем як рэзерв для згладжвання скачкоў цэн і стабільнага насычэння спажывецкага рынку ў міжсезонны перыяд. Гэта значыць капуста, бульба, буракі, морква і іншае - тое, што мы закладваем у сховішчы, - гэта для таго, каб забяспечыць нашых людзей у асенне-зімовы перыяд, пакуль не з'явіцца новы ўраджай. Зрабіце так, каб гэтых прадуктаў хапіла".

Прэзідэнт звярнуў увагу на тое, што ў лістападзе яшчэ адбудзецца грунтоўная размова аб гатоўнасці да зімова-стойлавага перыяду і запаўняльнасці агароднінасховішчаў.

Аб фэйках

Аляксандр Лукашэнка выказаўся наконт фэйкавай інфармацыі, якая часам з'яўляецца ў інтэрнэце і ў некаторых СМІ.

"У нас вельмі шмат пытанняў, якія трэба вырашаць. І гэтыя пытанні нам будуць падкідваць з розных бакоў. Я ўжо на гэта звяртаў увагу: нягоднікаў, інакш не назавеш, у нас хапае, - заўважыў кіраўнік дзяржавы. - У асноўным, вядома, гэта 99,8 працэнта фэйкі. Але ёсць інфармацыя, на якую трэба звяртаць увагу. Таму праходзіць гэты маніторынг. Больш таго, з выездам на месцы".

"Я, вядома, не хачу пералічваць гэтыя фэйкі, але КДК за ноч і раніцу праверыў некаторыя рэчы. Ну проста дзівішся, калі ўсё гэта чытаеш. Ну гэта нягоднікі. У іх святога нічога няма. Яны будуць пісаць, што дзясяткі, сотні гінуць у бальніцах, што не хапае кіслароду, не хапае нейкіх лякарстваў, лячэння і іншага. На злобу я гавару, што 99,8 працэнта - хлусня. Але ўсе павінны разумець, што любая інфармацыя правяраецца", - падкрэсліў беларускі лідар.

Аб выканальніцкай дысцыпліне

Прэзідэнт падкрэслівае важнасць выканальніцкай дысцыпліны ў цяперашняй складанай сітуацыі. "Вобразна кажучы, ідзе вайна. І вельмі важна ў гэтай складанай сітуацыі выканальніцкая дысцыпліна. Важна аднаасобнае кіраўніцтва ў гэтай сітуацыі. Калі ідзе вайна, не абмяркоўваюцца там розныя варыянты на працягу тыдня, таму што за гэты час загінуць тысячы людзей. І лепш прыняць не зусім дакладнае рашэнне, але дзейнічаць", - сказаў кіраўнік дзяржавы.

"Мною прыняты вывераныя рашэнні, якія падтрыманы самімі людзьмі. Ды і вы не былі супраць. Ну дык і выконвайце. Любое невыкананне, любая інфармацыя на гэту тэму... Вось не крыўдуйце на мяне. Усе вы свае людзі, але працаваць вы са мной не будзеце. Гэта датычыцца ўсіх. Асабліва Мінска, дзе ў мяне асноўны чалавек - вышэйшая службовая асоба (упаўнаважаны Прэзідэнта Беларусі па Мінску, старшыня Савета Рэспублікі Наталля Качанава. - Заўвага БЕЛТА). І там жа яшчэ ў нас цэлы міністр унутраных спраў (таксама ўпаўнаважаны па Мінску Іван Кубракоў. - Заўвага БЕЛТА), - папярэдзіў Аляксандр Лукашэнка. - А вам трэба ўказанне яшчэ ад Прэзідэнта, каб там нешта трэба было вырашыць".

Прэзідэнт папярэдзіў, што ўсе рашэнні, у прыватнасці па COVID-19, як і ў сельскай гаспадарцы, ім былі прыняты. "Гэта трэба няўхільна выконваць. Проста папярэджваю. Калі яшчэ атрымаецца так, як у Бабруйску або Мінску (не паспелі, бачыце, адмяніць раней прынятыя, Наталля Іванаўна, рашэнні ў гарвыканкаме). І пакінулі дур, які наогул страшна чытаць. Таксама праверылі. Вы ведаеце", - адзначыў беларускі лідар.

Ён растлумачыў, чаму ў такім выпадку часта згадвае ў гэтым плане Наталлю Качанаву: "Таму што Мінск - гэта рассаднік гэтых фэйкаў і іншага. Я не хацеў бы з вамі, як чалавекам адказным, на гэту тэму больш размаўляць. Як і з усімі іншымі. Рашэнні будуць імгненнымі і кардынальнымі. Не вас толькі датычыцца. Можа, Назарава (віцэ-прэм'ер, упаўнаважаны Прэзідэнта ў Гомельскай вобласці Юрый Назараў. - Заўвага БЕЛТА) гэта па Гомелі больш датычыцца, чым вас. Але я проста бяру для прыкладу".

Аляксандр Лукашэнка звярнуў увагу на факты злачыннай дзейнасці ў Гомельскай вобласці. "Паглядзіце, што ў Гомелі ў Назарава робіцца. Гэта ж катастрофа. Там па начах ужо кароў рэжуць і сплаўляюць у Расію. І гэта ж не першы месяц. І цішыня. Трэба было ўмяшанне Прэзідэнта, трэба было пасылаць туды Кубракова, каб ён некага там прыдушыў. Ну дык чакайце, ён там ужо", - сказаў кіраўнік дзяржавы.

"Ну а табе, калі ты ўпаўнаважаны Прэзідэнтам, трэба было, як чалавеку сельскаму, лясному, заняцца гэтымі сцежкамі, па якіх яны мяса вывозяць у Расію (праз жулікаў, і службовыя асобы гэтым павязаны) і там прадаюць", - звярнуўся Аляксандр Лукашэнка да віцэ-прэм'ера.

"Яшчэ раз папярэджваю: дамовіліся, прынята рашэнне - выконвайце. Гэта сёння галоўнае. Гэта пытанне нашай выжывальнасці. Інакш нас проста як у жорнах ператруць. Калі не з'ядуць, то выплюнуць", - запатрабаваў беларускі лідар.

Аб спробах прыдрацца да Беларусі

Гаворачы аб фэйках і перакручванні фактаў у інтэрнэце, Аляксандр Лукашэнка на нарадзе таксама пракаменціраваў рэакцыю на яго нядаўнюю заяву аб уплыве кавіду на ход анкалагічных захворванняў.

Кіраўнік дзяржавы адзначыў, што яшчэ на нарадзе па эпідэміялагічнай сітуацыі ў краіне спецыялісты ад медыцыны звярнулі ўвагу на адзін незвычайны факт: COVID-19 "прыдушыў" грып, гэта значыць захворванняў на грып у краіне пакуль практычна не адзначаецца.

"Але што адбылося з анкалогіяй: ужо трэці год у нас пандэмія, два гады дакладна, - пайшоў рэзкі спад выпадкаў анкалагічных захворванняў і рэзкі спад смярцей ад анкалагічных захворванняў. Вучоныя гэта заўважылі", - сказаў Аляксандр Лукашэнка.

Паводле яго слоў, медыкі спачатку лічылі, што людзі з анкалогіяй менш звяртаюцца па дапамогу з-за пачатку пандэміі каранавіруса. "Але калі другі год адбываецца гэта зніжэнне, вучоныя пачалі рабіць выснову, што кавід паўплываў і на ход анкалагічных захворванняў. І ў нашым анкацэнтры вучоныя гэта заўважылі і шэптам пачалі размаўляць", - растлумачыў Прэзідэнт. Кіраўнік дзяржавы расказаў, што вырашыў падрабязней даведацца аб гэтай сітуацыі.

Урачы РНПЦ медыцынскай радыялогіі ў Бараўлянах пацвердзілі гэта меркаванне ў размове з Аляксандрам Лукашэнкам, калі той наведваў медустанову. "Гавару, лепш будзем лячыць кавід, чым анкалогію. Дай бог, каб гэта так было", - адзначыў ён.

Пасля чаго Прэзідэнт агучыў назіранне вучоных на сустрэчы з работнікамі Мінскай абласной клінічнай бальніцы. Яго заява выклікала вялікі рэзананс у грамадстве і сродках масавай інфармацыі.

"Божа мой, ад Беларусі да Амерыкі - хто толькі ногі не выцірае аб гэту заяву Прэзідэнта. Але я ж не гавару, што кавід лечыць анкалогію. Вось такія факты. І дай бог, каб гэта было, - так было сказана. І кожны чапляецца... Няхай там амерыканцы, еўрапейцы, але ў Расіі ну столькі разумных з'явілася: "Ах, Прэзідэнт не спецыяліст, ён гаворыць, што кавід лечыць анкалогію". Але я ж так не гавару, - адзначыў кіраўнік дзяржавы. - Чапляюцца да ўсяго".

"Гэта сведчыць аб тым, што на любы чых рэагуюць вакол. Гэта значыць Беларусь - "костка" ў горле. І ў гэтай сітуацыі нам трэба будзе не проста выжыць. Нам трэба злаўчыцца, выкруціцца, выстаяць і захаваць сваю дзяржаву", - рэзюмаваў Аляксандр Лукашэнка.-0-

Падпісвайцеся на нас у
Twitter
Топ-навіны
Свежыя навіны Беларусі