26 сакавіка, Мінск /Аліна Грышкевіч - БЕЛТА/. Беларусь зацікаўлена ў далейшым пашырэнні кантактаў з Пакістанам у галіне прамысловасці і інвестыцый. Аб гэтым заявіў міністр прамысловасці Беларусі Павел Уцюпін 25 сакавіка на мерапрыемстве з нагоды нацыянальнага свята гэтай краіны, перадае карэспандэнт БЕЛТА.
Павел Уцюпін адзначыў, што паміж Беларуссю і Пакістанам створана важкая прававая база, якая налічвае каля 80 пагадненняў. Краіны ўстанавілі добрыя сувязі ў галіне сельскай гаспадаркі, фармацэўтыкі, навукі і адукацыі, якія, на яго думку, павінны паглыбляцца.
Міністр прамысловасці выказаў упэўненасць у перспектывах беларуска-пакістанскага ўзаемадзеяння.
У сваю чаргу пасол Пакістана ў Беларусі Ліна Салім Маазам падкрэсліла важнасць развіцця ўсебаковых кантактаў з Беларуссю. У 2019 годзе адзначаецца 25-годдзе беларуска-пакістанскіх дыпламатычных адносін. У сувязі з гэтым у Беларусі і Пакістане пройдзе шэраг мерапрыемстваў, накіраваных на святкаванне гэтай даты.
Паводле слоў Ліны Салім Маазам, узаемадзеянне паміж дзвюма дзяржавамі паступальна развіваецца, пашыраюцца міжпарламенцкія кантакты, сувязі паміж пародненымі гарадамі. Беларусь і Пакістан у гэтым годзе правядуць чарговы раўнд двухбаковых палітычных кансультацый.
Пасол таксама выказала надзею на развіццё турыстычных сувязей Пакістана і Беларусі, гэтаму павінна садзейнічаць зніжэнне візавых збораў для беларусаў.-0-
