7 кастрычніка, Мінск /Кар. БЕЛТА/. У Садружнасці Незалежных Дзяржаў прапануецца стварыць міждзяржаўны савет кіраўнікоў органаў судовых экспертыз. Адпаведны праект пагаднення абмяркоўваўся на пасяджэнні экспертнай групы сёння ў штаб-кватэры СНД у Мінску. Аб гэтым БЕЛТА паведамілі ў прэс-службе Выканаўчага камітэта СНД.
У пасяджэнні, якое прайшло з выкарыстаннем відэа-канферэнц-сувязі, прынялі ўдзел прадстаўнікі Арменіі, Беларусі, Казахстана, Кыргызстана, Расіі, Таджыкістана, Узбекістана і Выканаўчага камітэта СНД. Разгледзеўшы заўвагі і прапановы, якія паступілі ад дзяржаў да праекта пагаднення, эксперты дапрацавалі дакумент. Было вырашана накіраваць яго ў дзяржавы для разгляду і арганізаваць далейшае ўзгадненне праекта.
У прэс-службе адзначылі, што судова-экспертная дзейнасць з'яўляецца важным элементам процідзеяння міжнароднай арганізаванай злачыннасці, ад якасці і эфектыўнасці якой непасрэдна залежаць магчымасці рэалізацыі правоў грамадзянамі дзяржаў Садружнасці на справядлівы разбор справы ў разумны тэрмін незалежным і бесстароннім судом. Гэта абумоўлівае неабходнасць надання супрацоўніцтву ў гэтай сферы новай якасці, пераходу да доўгатэрміновага, сістэмнага і шматбаковага ўзаемадзеяння.
Асноўнай мэтай развіцця партнёрскіх адносін у сферы судова-экспертнай дзейнасці ў краінах Садружнасці з'яўляецца далейшае вырашэнне задач па абароне правоў і свабод грамадзян і інтарэсаў сваіх дзяржаў праз правядзенне аб'ектыўных навукова абгрунтаваных экспертыз і экспертных даследаванняў.
Прадугледжваецца, што міждзяржаўны савет кіраўнікоў органаў судовых экспертыз будзе вызначаць прыярытэтныя напрамкі супрацоўніцтва органаў судовых экспертыз дзяржаў СНД, ажыццяўляць інфармацыйна-аналітычную і навукова-метадычную работу, каардынаваць практычнае ўзаемадзеянне органаў судовых экспертыз і іншых зацікаўленых нацыянальных службаў і ведамстваў па асноўных аспектах, а таксама каардынаваць праграмы тэхнічнага садзейнічання ў сферы судова-экспертнай дзейнасці. У яго склад увойдуць кіраўнікі органаў судовых экспертыз краін Садружнасці, якія ажыццяўляюць рэалізацыю дзяржаўнай палітыкі ў сферы судова-экспертнай дзейнасці. Пры гэтым кожная дзяржава будзе мець у савеце адзін голас.-0-
