20 ліпеня, Мінск /Кар. БЕЛТА/. Нягледзячы на палітычную турбулентнасць, Беларусь і Украіна застаюцца важнымі рынкамі адзін для аднаго. Аб гэтым заявіў сёння журналістам пасол Беларусі ва Украіне Ігар Сокал, перадае карэспандэнт БЕЛТА.
"Нягледзячы на ўсю турбулентнасць палітычную, трэба прызнаць, што Украіна па-ранейшаму застаецца для нас важным стратэгічным рынкам. І мы для іх уваходзім у шасцёрку буйнейшых рынкаў па пастаўках украінскай прадукцыі", - сказаў пасол.
Паводле яго слоў, за студзень-май тавараабарот паміж краінамі вырас на 40 працэнтаў у параўнанні з аналагічным перыядам мінулага года. Пры гэтым беларускі экспарт павялічыўся на 60 працэнтаў з улікам нафтапрадуктаў, а імпарт з Украіны знізіўся на 6 працэнтаў. "Усе гэтыя лічбы яшчэ раз пацвярджаюць, што мы, нягледзячы на ўсе палітычныя перыпетыі, застаемся адзін для аднаго важнымі гандлёва-эканамічнымі партнёрамі", - адзначыў Ігар Сокал.
Дыпламат падкрэсліў, што кіраўніцтва Украіны павінна разумець гэта і ўсведамляць важнасць выбудоўвання зразумелых, празрыстых і партнёрскіх адносін з Беларуссю без перашкод і перапон.-0-