Рыбакоў расказаў пра кантакты беларускага боку з прадстаўнікамі Белага дома і Дзярждэпа

15 жніўня, Мінск /Кар. БЕЛТА/. Беларускі бок знаходзіцца ў кантакце з прадстаўнікамі Белага дома і Дзярждэпартамента ЗША, з якімі абмяркоўваюцца, сярод іншага, пытанні вызвалення зняволеных. Аб гэтым заявіў пастаянны прадстаўнік Беларусі ў ААН Валянцін Рыбакоў, каменціруючы тэлефонную размову беларускага і амерыканскага лідараў, паведамляе БЕЛТА.

Прэзідэнт ЗША пасля размовы з Прэзідэнтам Беларусі ў сацыяльнай сетцы Truth Social, сярод іншага, напісаў аб тым, што абмяркоўваецца "вызваленне яшчэ 1300 зняволеных". Валянціна Рыбакова спыталі, у якім ключы ішла размова на гэту тэму.

"У першую чаргу, Прэзідэнт Трамп падзякаваў Аляксандру Рыгоравічу за рашэнне аб вызваленні 16 чалавек. Калі ён пачаў далей гэту думку развіваць, наш Прэзідэнт яго спыніў і сказаў: "Дональд, мы работу гэту прадаўжаем, мы яе актыўна вядзём", - падзяліўся некаторымі падрабязнасцямі размовы двух лідараў Валянцін Рыбакоў.

Паводле яго слоў, беларускі бок знаходзіцца ў кантакце з прадстаўнікамі Белага дома і Дзярждэпартамента ЗША, з якімі вядуцца кансультацыі ў тым ліку па гэтай тэме. "Гэта ж пытанне двухбаковага, так сказаць, руху. Павінны быць прыняты пэўныя рашэнні кожнага з двух бакоў для таго, каб гэтыя пытанні паспяхова вырашыць", - канстатаваў Валянцін Рыбакоў.-0-