25 студзеня, Масква /Эдуард Півавар - БЕЛТА/. Экс-дзяржсакратар Саюзнай дзяржавы, член Камітэта па міжнародных справах Савета Федэрацыі Федэральнага Сходу РФ Рыгор Рапота ў сувязі з вучэннямі "Саюзная рашучасць" канстатаваў, што любыя беларуска-расійскія манеўры заўсёды падвяргаюцца нападкам з боку НАТА. Аб гэтым ён сказаў сёння на прэс-канферэнцыі, перадае карэспандэнт БЕЛТА.
Рыгор Рапота нагадаў, што ў Саюзнай дзяржаве створана рэгіянальная групоўка войскаў, якая аб'ядноўвае Заходнюю ваенную акругу Расіі і Узброеныя Сілы Беларусі. "З пункту гледжання прафесійнага, калі ствараецца нейкая ваенная групоўка, яна павінна быць у добрай баявой гатоўнасці, інакш грош цана яе стварэнню, - падкрэсліў ён. - Для таго каб яна была ў добрай баявой гатоўнасці, неабходна падтрымліваць праз ваенна-палявыя, аператыўныя, штабныя вучэнні гэту гатоўнасць. Цяпер адзін з элементаў гэтай падрыхтоўкі".
Экс-дзяржсакратар адзначыў: такія вучэнні праводзяцца штогод, па чарзе на тэрыторыі Беларусі і Расіі. "І я не памятаю выпадку, каб гэта не падпадала пад крытыку, сумненні і нападкі з боку нашых, так сказаць, суседзяў, з боку прадстаўнікоў НАТА. Тут тая ж сітуацыя, спекуляваць можна колькі хочаш, але сутнасць пытання ў гэтым: ёсць рэгіянальная групоўка, і трэба, каб у выпадку неабходнасці яна спрацавала так, як спрацавала АДКБ", - адзначыў ён.
"Наступнае вучэнне напэўна будзе на тэрыторыі Расіі і таксама будуць выступленні, мы ўжо да гэтага прывыклі. І наогул я прыхільнік таго, каб менш звяртаць увагу на тое, што гавораць там (на Захадзе. - Заўвага БЕЛТА). Мы павінны рабіць сваю справу і ведаць, для чаго гэта робім", - дадаў Рыгор Рапота.-0-
