Масуд Пезешкіян
20 жніўня, Мінск /Кар. БЕЛТА/. Мінск і Тэгеран маюць агульныя пазіцыі і погляды на пытанні сусветнага значэння. Аб гэтым Прэзідэнт Ірана Масуд Пезешкіян заявіў на перагаворах у вузкім складзе з Прэзідэнтам Беларусі Аляксандрам Лукашэнкам, перадае карэспандэнт БЕЛТА.
Прэзідэнт Ірана, звяртаючыся да Прэзідэнта Беларусі, адзначыў, што рады магчымасці знаходзіцца ў Мінску, каб абмеркаваць пытанні беларуска-іранскіх адносін. "Я павінен пацвердзіць той факт, што ў нас агульныя пазіцыі і погляды на агульныя пытанні сусветнага значэння", - сказаў Масуд Пезешкіян.
Іранскі Прэзідэнт таксама звярнуў увагу на дамоўленасці, якія былі дасягнуты ў рамках такіх арганізацый, як Еўразійскі эканамічны саюз, БРІКС і ШАС. На яго думку, дзякуючы гэтым структурам Іран і Беларусь могуць развіваць не толькі шматбаковыя, але і двухбаковыя адносіны.
"Вядома, нашы агульныя погляды павінны ўвасабляцца ў жыццё ў эканамічнай, культурнай сферах, у сферы развіцця турызму паміж нашымі краінамі, а таксама, як вы адзначылі, у развіцці ваенна-тэхнічнага супрацоўніцтва", - упэўнены Масуд Пезешкіян.
Ён нагадаў, што Захад ужо больш як 40 гадоў уводзіць розныя абмежавальныя меры супраць Ірана. Беларусь таксама доўгі час знаходзіцца пад заходнімі санкцыямі. Прэзідэнт Ірана лічыць, што такі аднабаковы дэструктыўны падыход з боку ЗША і іх саюзнікаў па ўсім свеце недапушчальны.
"Мы - і наша, і ваша краіна - хочам застацца незалежнымі. І ў рамках незалежных рашэнняў мы можам развіваць сваю дружбу і кааперацыю, - падкрэсліў Масуд Пезешкіян. - Мы разумеем, што нейтралізаваць гэтыя незаконныя санкцыі можа развіццё нашых адносін і нашы дамоўленасці, якія будуць рэалізаваны на практыцы".-0-
Падпісвайцеся на нас у
