16 студзеня, Мінск /Кар. БЕЛТА/. Цырымонія ўручэння нагрудных знакаў адрознення органаў дыпламатычнай службы Беларусі ўпершыню адбылася ў Міністэрстве замежных спраў, перадае карэспандэнт БЕЛТА.
Адпаведны нагрудны знак разам з афіцыйнай геральдыкай, прафесійным святам і форменным адзеннем беларускіх дыпламатычных работнікаў быў заснаваны ў кастрычніку 2018 года ўказам Прэзідэнта Беларусі ў мэтах захавання і развіцця традыцый беларускай дыпламатыі, павышэння прэстыжу дыпламатычнай службы. Напярэдадні 100-годдзя стварэння сістэмы органаў дыпламатычнай службы Беларусі, якое адзначаць 22 студзеня, нагрудны знак уручаецца ўсім супрацоўнікам знешнепалітычнага ведамства.
Ва ўрачыстай цырымоніі ў МЗС прыняў удзел першы намеснік міністра замежных спраў Андрэй Еўдачэнка. "Дыпламат - гэта "штучны тавар", і ў сістэме дзяржаўнай службы дыпламаты знаходзяцца на асаблівым уліку. За 100 гадоў развіцця беларускай дыпламатыі мы ўжо сфарміравалі пэўныя традыцыі, выпрацаваны пэўныя патрабаванні, якія прад'яўляюцца да супрацоўнікаў дыпламатычнай службы. Высокая прафесійная падрыхтоўка, бездакорныя асабістыя якасці, адданасць нашай Радзіме, патрыятызм - гэта як мінімум тыя якасці, якія павінны быць уласцівы кожнаму беларускаму дыпламату", - сказаў першы намеснік міністра.
На мерапрыемстве прысутнічалі дыпламаты розных пакаленняў. Член асацыяцыі ветэранаў МЗС, Надзвычайны і Паўнамоцны Пасол Мікалай Пацкевіч у размове з журналістамі адзначыў, што заснаванне геральдыкі і сімволікі МЗС успрынята дзеючымі дыпламатамі і ветэранамі дыпслужбы з радасцю і натхненнем. "Мы разглядаем гэта як знак таго, што вырас аўтарытэт дыпламатычнай службы. За апошнія дзесяцігоддзі адбудоўвалася сістэма дыпслужбы суверэннай Беларусі. Праведзена вялікая работа. Можа, для шырокага кола гэта не заўсёды было відаць, але ўсе сёння заўважылі, як вырас аўтарытэт Беларусі на міжнароднай арэне, як павысілася актыўнасць дыпламатаў, нашых пасольстваў на ўсіх міжнародных пляцоўках. У Беларусі сфарміравана дыпламатычная служба новай якасці", - заявіў ён.
У сваю чаргу старшыня клуба маладых дыпламатаў МЗС Алеся Бірыла адзначыла, што ўручэнне нагрудных знакаў з'яўляецца сапраўды знамянальнай падзеяй: "Для кожнага з нас гэта не проста ўпрыгажэнне або значок. Гэта перш за ўсё сімвал - фізічнае ўвасабленне мудрасці, вопыту, традыцый і талентаў, з'яднанасці нацыянальнай дыпламатычнай службы, а таксама аказанага даверу і прызнання дзяржавай высокага ўзроўню нашага прафесіяналізму".-0-
