7 кастрычніка, Масква /Эдуард Півавар - БЕЛТА/. Міністры замежных спраў краін СНД сустрэнуцца 14 кастрычніка ў Мінску. Аб гэтым паведаміла сёння на брыфінгу афіцыйны прадстаўнік МЗС Расіі Марыя Захарава, паведамляе карэспандэнт БЕЛТА.
"14 кастрычніка міністр замежных спраў Расіі Сяргей Лаўроў прыме ўдзел у пасяджэнні Савета міністраў замежных спраў Садружнасці Незалежных Дзяржаў, яно адбудзецца ў Мінску, - сказала Марыя Захарава. - Нагадаю, у бягучым годзе ў СНД старшынствуе Беларусь".
Кіраўнікі МЗС краін СНД абмяняюцца думкамі па актуальных тэмах міжнароднага парадку дня і ўзаемадзеяння ў фармаце СНД, абмяркуюць выносімыя на разгляд запланаванага на 15 кастрычніка ў Мінску Савета кіраўнікоў дзяржаў СНД праекты заяў у сувязі з 30-годдзем Садружнасці, аб развіцці супрацоўніцтва ў сферы міграцыі, аб забеспячэнні біялагічнай бяспекі. "На ўзроўні міністраў будзе прынята сумесная заява аб умацаванні канвенцыі аб забароне біялагічнай і таксіннай зброі, - адзначыла прадстаўнік МЗС РФ. - У кантэксце бясконцых спроб фальсіфікацыі гісторыі міністры зацвердзяць палажэнне аб міжнароднай асацыяцыі гісторыкаў і архівістаў краін СНД. Галоўнай яе задачай стане аб'ектыўная і бесстаронняя ацэнка падзей нашага агульнага мінулага, садзейнічанне пашырэнню доступу да архіўных дакументаў, каардынацыя работы вучоных".
Паводле слоў Марыі Захаравай, кіраўнікі знешнепалітычных ведамстваў СНД значную ўвагу плануюць удзяліць культурна-гуманітарнаму напрамку. У прыватнасці, будуць узгоднены праекты рашэнняў аб аб'яўленні горада Камрат (Рэспубліка Малдова) культурнай сталіцай Садружнасці ў 2023 годзе і плане мерапрыемстваў па правядзенні ў 2022 годзе ў СНД Года народнай творчасці і культурнай спадчыны.
"На сустрэчы кіраўнікі знешнепалітычных ведамстваў зацвердзяць план шматузроўневых кансультацый паміж міністэрствамі замежных спраў у рамках СНД на 2022 год", - дадала Марыя Захарава.-0-
