9 жніўня, Мінск /Кар. БЕЛТА/. Адносіны Беларусі і Расіі будуць мяняцца незалежна ад вынікаў выбараў, таму што змяніліся геапалітычныя ўмовы. Такое меркаванне выказаў заснавальнік і дырэктар Савета па міжнародных адносінах "Мінскі дыялог" Яўген Прэйгерман сёння ў Нацыянальным прэс-цэнтры, перадае карэспандэнт БЕЛТА.
"Адносіны Беларусі і Расіі змяняюцца і будуць змяняцца незалежна ад вынікаў выбараў і таго непрыемнага інцыдэнту, які нядаўна адбыўся (размова аб затрыманні ў Беларусі баевікоў. - Заўвага БЕЛТА). Яны змяняюцца таму, што тая негалосная здзелка двухбаковых адносін, якая была заключана ў другой палавіне 1990-х, сябе вычарпала: яна заключалася ў адных геапалітычных умовах, а сёння яны кардынальна памяняліся", - лічыць Яўген Прэйгерман.
Паводле яго слоў, асноўная перамена ў геапалітыцы заключаецца ў тым, што ніколі раней адносіны Расіі з Захадам не былі настолькі горшыя, чым адносіны Беларусі з Захадам. "Калі мы актыўна ўключаемся ў працэс процістаяння паміж Захадам і Расіяй, то проста па аб'ектыўнай прычыне - з-за невялікага памеру нашай краіны і размяшчэння. Многія рэчы будуць адбывацца без нашага ведама і згоды, мы можам стаць ледзь ці не пляцоўкай сутыкнення. Яшчэ 10 гадоў таму такі аргумент здаваўся б неверагодным. Але па сітуацыі з Украінай мы ўбачылі, што гэта не жарты", - упэўнены эксперт.
Такім чынам, Беларусь і Расія будуць мяняць нюансы ў сваіх адносінах. Праўда, убачыць вынікі змяненняў можна будзе толькі праз некаторы час. "Гэта балючы працэс, ён прыводзіць да недагаворванняў і недастатковага разумення. Але абедзве краіны разглядаюць адносіны як абсалютны прыярытэт, таму ёсць усе падставы для таго, каб знайсці рашэнне", - рэзюмаваў ён.-0-
