31 снежня, Мінск /Кар. БЕЛТА/. Дзяржаўная праграма "Рынак працы і садзейнічанне занятасці" на 2021-2025 гады зацверджана пастановай Савета Міністраў ад 30 снежня 2020 года нумар 777, паведамілі карэспандэнту БЕЛТА ў прэс-службе ўрада.
Галоўныя задачы да 2025 года - стымуляванне эканамічнай актыўнасці насельніцтва, уключэнне ў працоўную дзейнасць эканамічна неактыўнага насельніцтва, забеспячэнне збалансаванасці попыту і прапанавання на рынку працы, паляпшэнне ўмоў і аховы працы.
На рэалізацыю дзяржпраграмы "Рынак працы і садзейнічанне занятасці" плануецца накіраваць амаль Br221,7 млн.
Чакаецца, што ўзровень беспрацоўя да 2025 года будзе складаць не больш за 4,2 працэнта. Колькасць работнікаў, занятых на працоўных месцах са шкоднымі або небяспечнымі ўмовамі працы, павінна знізіцца не менш чым на 8 працэнтаў у параўнанні з 2020 годам.
Беспрацоўным прадоўжаць аказваць падтрымку для адкрыцця свайго бізнесу, займання рамеснай дзейнасцю, аграэкатурызмам. Будуць праводзіцца кірмашы вакансій, у тым ліку электронныя.
Прадугледжана стварэнне інфармацыйнай сістэмы прагназавання рынку працы, а таксама адзінай інтэграванай лічбавай платформы Нацыянальнай сістэмы кваліфікацый.
Плануецца рэалізацыя пілотнага праекта па прымяненні незалежнай ацэнкі і сертыфікацыі кваліфікацый у сектары сацыяльнага абслугоўвання і сектары будаўніцтва.
Паводле разлікаў экспертаў, у 2021-2025 гадах сітуацыя на рынку працы будзе фарміравацца ва ўмовах далейшага пераразмеркавання рабочай сілы паміж галінамі эканомікі. Дынаміка галіновай структуры занятасці будзе характарызавацца скарачэннем колькасці работнікаў у прамысловасці і сельскай гаспадарцы.
"Такія тэндэнцыі шмат у чым абумоўлены мадэрнізацыяй вытворчасці і ўкараненнем рэсурсазберагальных тэхналогій, ростам прадукцыйнасці працы і скарачэннем празмернай занятасці. Больш высокія тэмпы скарачэння ўзроўню занятасці ў сельскай гаспадарцы будуць звязаны са скарачэннем колькасці працаздольнага насельніцтва ў сельскай мясцовасці", - адзначаецца ў праграме.
Аналагічная дынаміка будзе назірацца і па колькасці занятага насельніцтва. Гэта абумоўлена змяншэннем колькасці насельніцтва ў працаздольным узросце і завяршэннем працэсу паступовага павышэння пенсійнага ўзросту, пачатага ў 2017 годзе.-0-