У СНД праведзены аналіз банкаўскага рэгулявання і нагляду

7 кастрычніка, Мінск /Кар. БЕЛТА/. У СНД праведзены аналіз банкаўскага рэгулявання і нагляду, паведамілі БЕЛТА ў Дэпартаменце эканамічнага супрацоўніцтва Выканаўчага камітэта СНД.

На аснове прадстаўленых вынікаў бягучай дзейнасці нацыянальных рэгулятараў банкаўскай сферы дзяржаў СНД Выканаўчым камітэтам СНД падрыхтаваны даклад "Аб рэгулятыўных рэжымах у сферы банкаўскага рэгулявання і нагляду ў дзяржавах - удзельніцах СНД". Прадстаўленыя даныя сведчаць, што краінамі СНД уводзяцца новыя патрабаванні да банкаўскага капіталу, удасканальваюцца падыходы банкаўскага нагляду, фарміруюцца сістэмы кіравання банкаўскімі рызыкамі і ўнутранага банкаўскага кантролю.

Устойлівасць эканамічнай сістэмы дзяржаў - удзельніц СНД у тым ліку залежыць ад стабільнасці банкаўскай сістэмы. Для ўмацавання фінансавай бяспекі банкаў і забеспячэння надзейнасці сусветнай банкаўскай сістэмы былі распрацаваны міжнародныя стандарты банкаўскага рэгулявання і нагляду.

17 верасня на пасяджэнні Камісіі па эканамічных пытаннях пры Эканамічным савеце СНД быў разгледжаны даклад "Аб рэгулятыўных рэжымах у сферы банкаўскага рэгулявання і нагляду ў дзяржавах - удзельніцах СНД" і па выніку разгляду накіраваны ва ўрады і цэнтральныя (нацыянальныя) банкі дзяржаў СНД.-0-