9 красавіка, Мінск /Кар. БЕЛТА/. Міжнародны форум па інфармацыйна-камунікацыйных тэхналогіях "ТІБО" прызначаны прадэманстраваць перадавыя лічбавыя тэхналогіі і будзе садзейнічаць іх больш шырокаму распаўсюджванню, заявіў сёння на адкрыцці выстаўкі міністр сувязі і інфарматызацыі Канстанцін Шульган, перадае карэспандэнт БЕЛТА.
Паводле слоў Канстанціна Шульгана, у Беларусі створаны добрыя стартавыя ўмовы для паспяховай лічбавай трансфармацыі і забеспячэння канкурэнтаздольнасці эканомікі. Фармат форуму прапрацаваны з улікам пастаўленых Прэзідэнтам і ўрадам прыярытэтных задач па развіцці сферы. На выстаўцы разам са стэндамі вядучых беларускіх і замежных тэлекамунікацыйных і ІТ-кампаній, інавацыйных стартап-праектаў прадстаўлены калектыўныя галіновыя стэнды, а таксама нацыянальная экспазіцыя Азербайджана.
"Асноўная мэта форуму - садзейнічанне эфектыўнай лічбавай трансфармацыі эканомікі і сістэмы дзяржаўнага кіравання. "ТІБО" наглядна дэманструе эфектыўнае прымяненне інфармацыйных тэхналогій у розных сферах дзейнасці", - адзначыў Канстанцін Шульган.
Міністр дадаў, што ў гэтым годзе выбраны новы падыход да арганізацыі мерапрыемства. Ядром выстаўкі стала цэнтральная экспазіцыя Міністэрства сувязі і інфарматызацыі, Аператыўна-аналітычнага цэнтра і іншых рэспубліканскіх органаў кіравання. Для дэманстрацыі адабраны пераважна завершаныя лічбавыя рашэнні, створаныя на базе сучасных тэхналагічных трэндаў і ўкаранёныя ў розных галінах: на вытворчасці, у арганізацыях сацыяльнай сферы, аховы здароўя, адукацыі і інш.
У дадатак да традыцыйных раздзелаў сфарміраваны новы тэматычны блок "Экасістэма інавацый", дзе прадстаўлены суб'екты інавацыйнай інфраструктуры (тэхнапаркі, бізнес-інкубатары, цэнтры трансферу тэхналогій, венчурныя фонды) і паспяхова рэалізаваныя з іх дапамогай праекты.
Экспазіцыя "Адукацыйная алея" знаёміць з паслугамі дзяржаўных і недзяржаўных устаноў адукацыі, адукацыйным кантэнтам для дыстанцыйнага навучання.
Канстанцін Шульган падкрэсліў, што ўдзельнікам форуму прапанавана насычаная праграма, якая будзе цікавая як спецыялістам, так і тым, хто прыйшоў на мерапрыемства ўпершыню.
У сваю чаргу міністр лічбавага развіцця, сувязі і масавых камунікацый Расіі Канстанцін Наскоў адзначыў высокі ўзровень арганізацыі форуму, аб чым сведчыць вялікая колькасць наведвальнікаў і стэндаў з найноўшымі тэхналогіямі.
Форум "ТІБО" праводзіцца з 8 па 12 красавіка на пляцоўцы комплексу "Мінск-Арэна". У час форуму праходзяць буйныя мерапрыемствы ў галіне ІКТ, у якіх прымаюць удзел кіраўнікі міжнародных і рэгіянальных арганізацый, замежных міністэрстваў, ведамстваў і аператараў сувязі. У іх ліку Еўразійскі лічбавы форум, Беларускі ІКТ-саміт, канферэнцыя па кіраванні спектрам для краін СНД, Цэнтральнай і Усходняй Еўропы і семінар Міжнароднага саюза электрасувязі па пытаннях радыёманіторынгу.-0-