5 лютага, Мінск /Кацярына Марковіч - БЕЛТА/. У Беларусі распрацоўку будаўнічых норм і правіл плануецца завяршыць у 2020 годзе. Аб гэтым паведаміў намеснік прэм'ер-міністра Уладзімір Кухараў, адказваючы на пытанні журналістаў перад пачаткам калегіі Мінбудархітэктуры, перадае карэспандэнт БЕЛТА.
"На сённяшні дзень прыняты ўжо 33 будаўнічыя нормы. У першым паўгоддзі плануем завяршыць работу над нормамі. Таксама мы займаемся будаўнічымі правіламі, якія значна спросцяць будаўніцтва ў краіне, да таго ж яны цалкам адпавядаюць еўрапейскім нарматыўным стандартам", - адзначыў віцэ-прэм'ер.
Як паведаміў Уладзімір Кухараў, спецыялісты разгледзелі таксама шэраг іншых напрамкаў, такіх як індывідуальнае будаўніцтва. "Практычна падрыхтаваны праекты новых дамоў - больш камфортных і танных, якія дадуць магчымасць значна павялічыць аб'ёмы будаўніцтва індывідуальнага жылля", - растлумачыў ён.
Адпрацавана пытанне аб пераходзе на электрычнае ацяпленне. "Гэта сур'ёзнае пытанне, паколькі ў нас завяршаецца будаўніцтва АЭС, і мы павінны максімальна выкарыстоўваць электрычную энергію. Перапрацаваны ўсе праекты новых дамоў, будынкаў і збудаванняў, садоў і школ, якія дадуць магчымасць пераходзіць на ацяпленне электраэнергіяй як на этапе будаўніцтва, так і капітальнага рамонту", - падкрэсліў Уладзімір Кухараў.-0-
