7 мая, Мінск /Кар. БЕЛТА/. Інфармацыя пра колькасць здзелак куплі-продажу нерухомай маёмасці стала даступна без падключэння да рэестра цэн, паведамілі БЕЛТА ў прэс-службе Дзяржаўнага камітэта па маёмасці.
Нацыянальнае кадастравае агенцтва (НКА) Дзяржкаммаёмасці абнавіла версію рэестра цэн на зямельныя ўчасткі дзяржаўнага зямельнага кадастру.
Для інфармавання карыстальнікаў аб колькасці здзелак куплі-продажу без падключэння да рэестра цэн на галоўнай старонцы рэсурсу з'явіліся хуткі пошук і статыстыка здзелак (з 1 студзеня 2005 года) у выглядзе графіка і проста інфармпаведамлення.
У новай версіі дабаўлены пошук па адрасе. "Некаторыя населеныя пункты маюць аднолькавыя назвы, але размяшчаюцца ў розных сельскіх саветах, раёнах і абласцях. Каб карыстальнікі маглі знайсці патрэбны, у поле ўводу дабаўлены поўны адрас (вобласць, раён, сельсавет, горад). Напрыклад, Віцебская вобласць, Верхнядзвінскі раён, Дзёрнавіцкі с/с, в. Слабада", - растлумачылі ў прэс-службе.
Чырвоным колерам адзначаны населеныя пункты, якія больш не існуюць (ліквідаваны), аднак у іх раней былі праведзены здзелкі куплі-продажу нерухомай маёмасці, інфармацыя аб якіх цяпер даступная да пошуку і прагляду.
Аб'екты нерухомай маёмасці пры пошуку могуць быць згрупаваны па прызначэннях: жылая, нежылая, неўстаноўленага прызначэння нерухомая маёмасць, а таксама збудаванні. Пры выбары адной з вышэйназваных груп аўтаматычна выбіраюцца ўсе прызначэнні, якія былі да яе аднесены.
Якія менавіта прызначэнні ёсць у кожнай групе, можна паглядзець на сайце https://pr.nca.by/.-0-