15 красавіка, Мінск /Кар. БЕЛТА/. Беларускі дзяржаўны канцэрн па нафце і хіміі і Дзяржаўная нафтавая кампанія Азербайджана (SOCAR) падпісалі мемарандум аб узаемаразуменні. Подпісы пад дакументам паставілі старшыня канцэрна "Белнафтахім" Андрэй Рыбакоў і прэзідэнт SOCAR Раўнаг Абдулаеў, паведамляе БЕЛТА са спасылкай на часопіс "Вестник "Белнефтехима".
Мемарандум прадугледжвае пашырэнне магчымасцей бакоў у галіне вытворчасці і рэалізацыі нафты і нафтапрадуктаў. Асноўныя напрамкі супрацоўніцтва арыентаваны на паляпшэнне ўзаемадзеяння ў сферы арганізацыі паставак азербайджанскай нафты ў Беларусь, а таксама актывізацыі дыялогу паміж вытворцамі і спажыўцамі вуглевадародных рэсурсаў, тэхнічнага аўдыту на беларускіх нафтаперапрацоўчых заводах для павышэння эфектыўнасці.
У мемарандуме агаворваецца супрацоўніцтва пры рэалізацыі вырабленых у Беларусі нафтапрадуктаў, у тым ліку сумесна з беларускімі экспарцёрамі, узаемадзеянне па рэалізацыі сумесных інвестыцыйных праектаў, а таксама супрацоўніцтва ў рэалізацыі SOCAR нафтапрадуктаў на ўнутраным рынку Беларусі.-0-
