13 верасня, Мінск /Кар. БЕЛТА/. Новая рэдакцыя Падатковага кодэкса, якая была прынята ў снежні мінулага года, станоўча паўплывала на дзелавы клімат у Беларусі. Такое меркаванне выказала сёння ў Магілёве на пашыраным пасяджэнні прэзідыума навукова-кансультатыўнага савета па пытаннях сацыяльна-эканамічнага развіцця пры Прэзідыуме Савета Рэспублікі дырэктар бізнес-саюза прадпрымальнікаў і наймальнікаў імя Куняўскага Жанна Тарасевіч. Аб гэтым БЕЛТА паведамілі ў прэс-службе верхняй палаты беларускага парламента.
На пасяджэнні прадстаўнікі бізнесу, МПЗ, парламентарыі, вучоныя абмеркавалі, як на практыцы рэалізуюцца нормы абноўленага Падатковага кодэкса. "Калі гаварыць аб новай рэдакцыі Падатковага кодэкса, то яна спрацавала. Тую працу, якая была зроблена з пункту гледжання змяншэння падатковага адміністравання, бізнес ацаніў", - адзначыла Жанна Тарасевіч. Стала прасцей лічыць падатак на прыбытак, унесены важныя змяненні, якія рэгулююць падаткі на зямлю і нерухомую маёмасць. У цэлым спрошчана сістэма падаткаабкладання, асабліва для індывідуальных прадпрымальнікаў.
У той жа час фіскальная палітыка патрабуе далейшага ўдасканалення, больш дынамічнага пераходу да стымулюючых мер, лічыць кіраўнік бізнес-саюза. "Але гэта не азначае, што трэба адмяніць якія-небудзь падаткі. Неабходна проста перагледзець, зрабіць інвентарызацыю падаткаў, непадатковых плацяжоў, якія ўваходзяць у падатковую нагрузку, і пасля гэтага думаць над далейшымі крокамі", - сказала яна. У якасці прыкладу Жанна Тарасевіч прывяла абавязковыя сацыяльныя адлічэнні. На думку бізнесу, сістэма іх выплаты патрабуе ўдасканалення - пераразмеркавання нагрузкі паміж работнікам і наймальнікам. Дзелавыя колы таксама хвалююць пытанні маркіроўкі тавараў, асобныя нюансы адлічэнняў страхавых выплат і іншыя.
Як адзначыў старшыня Савета Рэспублікі Міхаіл Мясніковіч, парламентарыі праводзяць маніторынг рэалізацыі норм Падатковага кодэкса на практыцы. "Нам важна зваротная сувязь - ці спрошчана сістэма падаткаабкладання, наколькі сфарміравана база нарматыўна-прававых актаў другога ўзроўню, падзаконных актаў і гэтак далей", - растлумачыў спікер. Адна з галоўных задач новай рэдакцыі кодэкса - уключэнне норм прамога дзеяння і змяншэнне адсылачных норм. Гэта аблягчае работу эканамічных службаў арганізацый і прадпрыемстваў. "Паводле існуючых звестак, сур'ёзных нюансаў няма. Усе адзначаюць, што падаткаабкладанне крыху палепшылася з прыняццем новых норм, фармулёвак Падатковага кодэкса", - адзначыў ён.
Мэта пасяджэння ў Магілёве - пачуць кіраўнікоў прадпрыемстваў, парламентарыяў, вучоных, прадстаўнікоў органаў улады па гэтых пытаннях. "Мы хочам абмеркаваць, як ідуць справы, і пры неабходнасці прыняць рашэнне аб рабоце над змяненнямі і дапаўненнямі ў дзеючае заканадаўства, - падкрэсліў кіраўнік верхняй палаты парламента. - У Савеце Рэспублікі не ставяць пад сумненне тыя рашэнні, якія прыняты ў рамках Падатковага кодэкса. Але ўдасканаленне падатковага заканадаўства - працэс пастаянны і, безумоўна, без меркавання тых, для каго гэта робіцца, складана гаварыць, вобразна кажучы, аб "траплянні ў дзясятку".
У сваю чаргу міністр па падатках і зборах Сяргей Налівайка дадаў, што МПЗ бачыць тыя моманты па Падатковым кодэксе, якія трэба адшліфаваць. "Мы хочам пачуць бізнес: што першаснае і патрабуе ўвагі. Гэта больш тэхнічная работа, якая не ўплывае на канцэптуальныя асновы дакумента. Нягледзячы на тое, што гэта вузкія моманты, мы хочам, каб іх аднолькава ўспрымалі і трактавалі", - падагульніў міністр.-0-
