18 сакавіка, Мінск /Кар. БЕЛТА/. Нафтахімічная прадукцыя застанецца запатрабаванай і пры развіцці электратранспарту. Такое меркаванне ў прэс-цэнтры БЕЛТА ў час чарговага пасяджэння праекта "Экспертнае асяроддзе" - "Нафта, каранавірус і новая рэальнасць" выказаў прэс-сакратар канцэрна "Белнафтахім" Аляксандр Цішчанка.
Ён расказаў аб стратэгіі развіцця нафтахімічнага комплексу да 2030 года. Яна прадугледжвае, што ААТ "Нафтан" будзе развівацца па нафтахімічным напрамку, а Мазырскі нафтаперапрацоўчы завод захавае паліўны профіль. "Трэнды на тое, што "хімія" нікуды не дзенецца, у нас прадугледжаны. Яна ўсё роўна будзе прысутнічаць, нягледзячы на тое, што з'явяцца электрамабілі, новыя віды энергіі, крыніцы і гэтак далей, - адзначыў Аляксандр Цішчанка. - Зразумела, трэба рабіць гэты фармат больш ёмістым і рэнтабельным". Стратэгія прадугледжвае мадэрнізацыю заводаў, яна завершыцца ў бліжэйшыя гады, дадаў прэс-сакратар канцэрна.
Загадчык кафедры міжнародных адносін Акадэміі кіравання пры Прэзідэнце доктар палітычных навук, прафесар Сяргей Кізіма лічыць, што галіне трэба ўжо праз пяць-сем гадоў пераарыентавацца на вытворчасць высокатэхналагічных нафтахімічных тавараў. "Гэта будзе запатрабавана ў будучым і дасць значна больш дабавачнай вартасці", - лічыць ён. Сяргей Кізіма нагадаў, што масавая вытворчасць аўтамабіляў з электрарухавікамі ў Еўропе плануецца з 2035 года. Эксперт не выключыў, што тэрміны могуць зрушыцца з улікам экалагізацыі еўрапейцаў, і ўжо гадоў праз дзесяць машыны з рухавікамі ўнутранага згарання наогул пойдуць з рынку.
Як паведамлялася, пры распрацоўцы стратэгіі развіцця нафтахімічнага комплексу да 2030 года ўлічваліся знешнія рызыкі і шляхі іх мінімізацыі. Яна дае магчымасць работы ва ўмовах выхаду на сусветную цану на нафтахімічную сыравіну, здымае залежнасць галіны ад цэнавых ваганняў. "Белнафтахім" сканцэнтраваўся на дыверсіфікацыі выпускаемай прадукцыі.
Так, стратэгія прадугледжвае, што ААТ "Нафтан" будзе развівацца па нафтахімічным напрамку, прадугледжана мадэрнізацыя завода "Палімір". Што датычыцца Мазырскага НПЗ, то сёння ён больш арыентаваны на вытворчасць якаснага маторнага паліва. Яго развіццё, згодна са стратэгіяй, - у аптымізацыі тэхналагічных працэсаў, аперацыйных затрат. Гэта дасць магчымасць з меншымі выдаткамі атрымліваць якаснае паліва, задавальняць рынкі ў залежнасці ад попыту.-0-
