3 лютага, Мінск /Кар. БЕЛТА/. Азімыя пакуль пераносяць цёплую зіму нядрэнна, паведаміў міністр сельскай гаспадаркі і харчавання Анатоль Хацько ў эфіры праграмы "Галоўны эфір" на тэлеканале "Беларусь 1" 2 лютага, паведамляе карэспандэнт БЕЛТА.
"Мы разумеем, што сёння надвор'е не такое, як павінна быць па каляндарным плане. Чакаем рэкамендацыі ад Нацыянальнай акадэміі навук, якія будуць нам. Што датычыцца стану пасеваў, перазімоўка ідзе нядрэнна. Вядома, неабходна надвор'е, каб не было крытычных перападаў тэмператур", - сказаў Анатоль Хацько.
Паводле яго слоў, з улікам вопыту мінулага года, пасевы азімых культур павялічаны.
"Мы разлічваем на рост вытворчасці кармоў, каб забяспечыць паўтарагадовы запас. Па малаку і мясу чакаем рост не менш як 4 працэнты", - падзяліўся міністр.
Адказваючы на пытанне аб экспарце, Анатоль Хацько растлумачыў, што па выніках 2019 года чакаецца прырост паставак не менш як на 4 працэнты, у грашовым выражэнні гэта каля $200 млн. "Вядома, у 2020 годзе плануем павялічыць аб'ёмы экспарту. Мы пастаўляем ужо нашу прадукцыю ў амаль 100 краін", - дадаў ён.
Плануецца пашыраць прысутнасць на рынку Кітая, ідзе работа па сертыфікацыі беларускіх прадпрыемстваў для паставак у Алжыр, ёсць інтарэс да рынку Марока і шэрага іншых краін.-0-
