5 мая, Масква /Эдуард Півавар - БЕЛТА/. Пагадненне аб мерах, накіраваных на ўніфікацыю правядзення селекцыйна-племянной работы з сельскагаспадарчымі жывёламі ў рамках Еўразійскага эканамічнага саюза, уступае ў сілу з 6 мая, паведамілі БЕЛТА ў прэс-службе Еўразійскай эканамічнай камісіі.
Гэты дакумент быў падпісаны дзяржавамі ЕАЭС у кастрычніку 2019 года. "Адначасова ўступае ў сілу шэсць актаў Еўразійскай эканамічнай камісіі, прынятых у 2020-2021 гадах, - праінфармавалі ў прэс-службе. - Яны неабходны для рэалізацыі пагаднення і вызначаюць парадак ажыццяўлення асноўных працэсаў вытворчасці племянной прадукцыі. Сярод такіх працэсаў - ацэнка племянной каштоўнасці жывёл; малекулярная генетычная экспертыза племянной прадукцыі; вызначэнне пароды (пароднасці) племянных жывёл; апрабацыя новых парод, тыпаў, ліній і кросаў сельскагаспадарчых жывёл".
Акрамя таго, у адпаведнасці з пагадненнем зацверджаны склад звестак аб племянных жывёлах і селекцыйных дасягненнях, якія падпадаюць пад абмен паміж дзяржавамі саюза, а таксама парадак каардынацыі і аналітычнага забеспячэння селекцыйна-племянной работы ў галіне племянной жывёлагадоўлі, што праводзіцца ў дзяржавах - членах ЕАЭС.
"Пагадненне і распрацаваныя для яго рэалізацыі дакументы ствараюць прававы механізм, які дазваляе ажыццяўляць племянную работу ў краінах саюза з прымяненнем адзіных методык, парадкаў у сферы вытворчасці і ацэнкі племянной прадукцыі, - падкрэслілі ў ЕЭК. - З'яўляецца магчымасць аб'яднаць у рамках ЕАЭС намаганні па распрацоўцы і ўкараненні ў племянной жывёлагадоўлі інавацыйных тэхналогій, уключаючы геномную селекцыю. Рэалізацыя пагаднення стане рэальным крокам да практычнай інтэграцыі ў аграпрамысловым комплексе краін саюза".
Зыходным пунктам у развіцці племянной жывёлагадоўлі паслужыць пераход у бліжэйшыя два гады ключавых галін жывёлагадоўлі на сучасныя методыкі ацэнкі і прагназавання племянной каштоўнасці на аснове метаду найлепшага лінейнага прагнозу (BLUP). "Усе звесткі аб племянных жывёлах, іх прадукцыйнасці, наяўнасці генетычных захворванняў і іншыя неабходныя даныя, якія, па сутнасці, з'яўляюцца электроннай версіяй племяннога пасведчання, будуць уносіцца племяннымі службамі дзяржаў ЕАЭС у нацыянальныя інфармацыйныя сістэмы ў адпаведнасці з адзінымі парадкамі і методыкамі, - адзначылі ў прэс-службе. - Абмен такімі звесткамі будзе забяспечаны пры дапамозе інтэграванай інфармацыйнай сістэмы саюза ў рамках ажыццяўлення Агульнага працэсу "Фарміраванне, вядзенне і выкарыстанне базы даных аб племянных жывёлах і селекцыйных дасягненнях". Распрацоўка тэхналагічнай дакументацыі для яго рэалізацыі запланавана ў 2021 годзе".
Для выпрацоўкі ўзгодненых рашэнняў па стратэгіі развіцця і арганізацыі племянной справы ў рамках ЕАЭС, забеспячэння каардынацыі работы дзяржаўных органаў, навуковых устаноў, арганізацый дзяржаў-членаў, якія ажыццяўляюць дзейнасць у галіне племянной справы, на рэгулярнай аснове будуць праводзіцца каардынацыйныя нарады. У перспектыве, пасля ўкаранення ў вытворчасць племянной прадукцыі прынятых актаў саюза, прадугледжваецца распрацаваць сістэму геномнай селекцыі ЕАЭС, якая дасць магчымасць праводзіць адбор племянных жывёл у раннім узросце. "Гэта істотна павысіць эфектыўнасць племянной работы, дазволіць эканоміць значныя сумы на ўтрыманні племяннога пагалоўя і паскорыць развіццё жывёлагадоўлі, - сказалі ў ЕЭК. - Для вырашэння гэтай задачы і аналітычнага забеспячэння селекцыйна-племянной работы плануецца стварэнне аналітычных цэнтраў".
Безбар'ерны гандаль і забеспячэнне краін саюза высокапрадукцыйнай племянной прадукцыяй уласнай вытворчасці дасць магчымасць павысіць канкурэнтаздольнасць аграпрамысловых комплексаў саюзных дзяржаў, знізіць узровень імпартазалежнасці.
"Названыя дакументы, на думку экспертаў, акажуць станоўчы ўплыў на развіццё селекцыйнай работы і гандлю племянной прадукцыяй у краінах Еўразійскага эканамічнага саюза", - рэзюмавалі ў прэс-службе.-0-
