20 снежня, Мінск /Кар. БЕЛТА/. На сустрэчы прэзідэнтаў Беларусі і Расіі Аляксандра Лукашэнкі і Уладзіміра Пуціна 19 снежня ў Мінску абмяркоўваліся важныя пытанні ў розных напрамках, у тым ліку ў навукова-тэхнічнай сферы. Расійскі лідар пацвердзіў планы аб палёце беларускага касманаўта ў 2023 годзе. Аб іншых перспектыўных напрамках навукова-тэхнічнага супрацоўніцтва Беларусі і Расіі карэспандэнту БЕЛТА расказаў доктар эканамічных навук Валерый Байнёў.
"Калі скласці нашы патэнцыялы, то мы будзем канкурэнтаздольныя ва ўсіх адносінах. Расія апошнія 20 гадоў рабіла стаўку на сваю канкурэнтную перавагу - газ, нафту, руды металаў, гэта значыць тавары сыравіннай групы. А Беларусь, паколькі пазбаўлена такіх тавараў, зрабіла стаўку на інтэлект, працавітасць, навукова-тэхнічны патэнцыял. Таму атрымалася так, што Беларусь і Расія дапаўняюць адзін аднаго", - расказаў Валерый Байнёў.
Расія трапіла ў складаную сітуацыю, паколькі цяпер супраць яе разгортваецца акт калектыўнай агрэсіі, адзначыў эканаміст. "І Расія разумее, што толькі сыравіннымі таварамі не абысціся. Менавіта таму Уладзімір Уладзіміравіч прыехаў у Беларусь за вопытам у спробе аб'яднаць прыродныя, тэрытарыяльныя і людскія рэсурсы", - адзначыў ён.
Цяпер прарыўны напрамак у навукова-тэхнічным узаемадзеянні Беларусі і Расіі - космас. "Ваенная сітуацыя ва Украіне паказала, што касмічная сфера адыгрывае істотную ролю на прыкладзе магутнай спадарожнікавай групоўкі НАТА, якая забяспечвае інфармацыйную перавагу на полі бою. Тут трэба наганяць, - сказаў Валерый Байнёў. - Таксама вельмі важны напрамак, у якім Беларусь захавала кампетэнцыі, - мікраэлектроніка, наш завод "Інтэграл". Расійскія прадпрыемствы ў гэтай сферы робяць упор на імпартнае тэхналагічнае абсталяванне. У Беларусі прадпрыемствы захавалі лінейку абсталявання ўласнай вытворчасці. Так, яно не такое сучаснае, але сваё".
Акрамя гэтага, Валерый Байнёў адзначыў, што станкабудаванне таксама вельмі важны напрамак супрацоўніцтва, які трэба развіваць дзвюм краінам. "Тэхналагічная вайна, якую нам аб'явіў Захад, перш за ўсё, датычыцца забароны на пастаўкі тэхналагічнага абсталявання. Тут узнікаюць сур'ёзныя праблемы, таму што значная частка станочнага парку і ў Беларусі, і ў Расіі - імпартная. З часам гэта абсталяванне будзе старэць і выходзіць са строю, а ва ўмовах тэхналагічнага эмбарга абнаўляць яго будзе складана. Трэба прыкладаць значныя намаганні для развіцця такога напрамку", - канстатаваў эканаміст.
Эксперт адзначыў таксама, што перспектыўны напрамак развіцця навукова-тэхнічнага супрацоўніцтва Беларусі і Расіі - пасажырскае, грузавое машынабудаванне.-0-
