27 верасня, Мінск /Юлія Огнева - БЕЛТА/. ААТ "Белінвестбанк" і Еўрапейскі банк рэканструкцыі і развіцця падпісалі крэдытнае пагадненне на 8 млн еўра па праграме фінансавання ўстойлівай энергетыкі для Беларусі (BelSEFF), перадае карэспандэнт БЕЛТА.
Крэдытная лінія BelSEFF будзе выкарыстана Белінвестбанкам для фінансавання праектаў у галіне энергаэфектыўнасці і аднаўляльных крыніц энергіі па ўсёй краіне. Гэта забяспечыць крэдытора неабходнымі рэсурсамі для падтрымкі мясцовых малых і сярэдніх прадпрыемстваў, а таксама асобных прадпрыемстваў дзяржсектара.
Дадатковай перавагай для Белінвестбанка стане доступ да пакета бясплатнай тэхнічнай дапамогі для падтрымкі крэдытавання ў рамках крэдытнай лініі BelSEFF. Гэта тэхнічная дапамога фінансуецца за кошт гранта ад Міністэрства фінансаў Чэхіі.
"Мы высока ацэньваем вынікі нашага супрацоўніцтва з Еўрапейскім банкам рэканструкцыі і развіцця. На бягучы момант дзякуючы дапамозе ЕБРР у Белінвестбанку актыўна ідуць працэсы, якія пасля іх завяршэння прывядуць да максімальнай камерцыялізацыі дзейнасці банка. Мы паспяхова рэалізоўваем план мерапрыемстваў па дыверсіфікацыі крэдытнага партфеля і па павышэнні эфектыўнасці ажыццяўляемых банкам аперацый", - адзначыў старшыня праўлення Белінвестбанка Генадзь Сысоеў. Паводле яго слоў, можна гаварыць аб тым, што значная частка крэдытных рэсурсаў, прадастаўленых па праграме фінансавання мікра-, малых і сярэдніх прадпрыемстваў і па праграме садзейнічання развіццю гандлю, у рамках падпісаных з ЕБРР пагадненняў у маі 2015 года, Белінвестбанкам асвоена.
ААТ "Белінвестбанк" - адзін з буйнейшых дзяржаўных банкаў Беларусі. У сваёй дзейнасці ён нацэлены на рэалізацыю асноўных напрамкаў грашова-крэдытнай палітыкі краіны, садзейнічанне міжнароднаму эканамічнаму супрацоўніцтву, прадастаўленне кліентам шырокага спектра банкаўскіх паслуг. Белінвестбанк мае вялікую філіяльную сетку ў Беларусі колькасцю каля 150 структурных падраздзяленняў і прадстаўніцтва ў Польшчы.
Еўрапейскі банк рэканструкцыі і развіцця быў заснаваны ў 1991 годзе. ЕБРР інвесціруе ў праекты, якія садзейнічаюць пераходу да адкрытай рыначнай эканомікі, а таксама развіццю прыватнай і прадпрымальніцкай дзейнасці. Банк дзейнічае ў інтарэсах усіх сваіх 65 краін-акцыянераў, а таксама Еўрапейскага саюза і Еўрапейскага інвестыцыйнага банка.-0-
