Сцяг Аўторак, 19 сакавіка 2024
Усе навіны
Усе навіны
Эканоміка
04 кастрычніка 2022, 11:07

Дзяржаўная будаўнічая экспертыза: што гэта такое і як яна праводзіцца

4 кастрычніка, Мінск /Кар. БЕЛТА/. Дырэктар РУП "Галоўдзяржбудэкспертыза" заслужаны будаўнік Рэспублікі Беларусь Віктар Пятруша ў інтэрв'ю часопісу "Экономика Беларуси" расказаў, што такое дзяржаўная будаўнічая экспертыза і як яна праводзіцца, паведамляе БЕЛТА.

Гэта працэдура - адзін з асноўных напрамкаў дзяржаўнага рэгулявання ў галіне архітэктурнай, горадабудаўнічай і будаўнічай дзейнасці. Яе правядзенне дапамагае заказчыкам, забудоўшчыкам, інвестарам прымаць аб'ектыўныя абгрунтаваныя рашэнні наконт будаўніцтва аб'ектаў з захаваннем дзяржаўных прыярытэтаў у галіне бяспекі і надзейнасці. "Менавіта ў гэтым і заключаецца важнасць экспертызы для працэсаў будаўніцтва, паколькі прафесійная кампетэнтнасць экспертаў дазваляе задаволіць інтарэсы як дзяржавы, так і заказчыкаў. Без станоўчага заключэння па праекце, уласна, будоўля не можа быць пачата", - сказаў Віктар Пятруша.

На правядзенне дзяржаўнай будаўнічай экспертызы згодна з законам адводзіцца роўна месяц. У адпаведнасці з унутранымі стандартамі РУП "Галоўдзяржбудэкспертыза" для забеспячэння гэтай нормы ўстанавіла строгі і практычна вывераны алгарытм дзеянняў. На працягу трох дзён пасля прыёмкі праектнай дакументацыі для экспертызы афармляецца і накіроўваецца заяўніку дагавор на яе правядзенне. Пасля атрымання перадаплаты пачынаецца адлік часу, адведзенага законам для правядзення экспертызы. На працягу 10 дзён эксперты інспектуюць праект і па выніках выносяць комплексныя заўвагі. Праекціроўшчыку на працягу 10 наступных дзён неабходна прадаставіць комплексныя адказы на гэтыя заўвагі. Калі па выніках аналізу адказаў эксперты бачаць, што заўвагі не ліквідаваны, то яны выдаюць адпаведнае паведамленне. Вынікам такіх тэхналагічных дзеянняў можа быць адмоўнае заключэнне або дапрацоўка праекта тэрмінам да аднаго месяца. Закон дазваляе прадоўжыць тэрмін экспертызы яшчэ на месяц па просьбе заяўніка ў абгрунтаваным выпадку (калі аб'ект складаны ці заўвагі не паспелі ўстараніць у сувязі з непрадбачанымі абставінамі). Пры гэтым для дзеянняў экспертаў ёсць яшчэ адна ўмова - адсутнасць прамых недакументаваных кантактаў, так званы бескантактавы метад. Эксперт ведае, што ён не можа, напрыклад, сустрэцца з праекціроўшчыкам на вуліцы і абмяркоўваць рабочыя пытанні па праекце, які знаходзіцца на гэты момант на экспертызе.

"Нашы расійскія калегі (ды і замежныя эксперты нам гэта рэкамендавалі) раней практыкавалі выдачу адназначна адмоўнага заключэння ў выпадку нявыпраўленасці распрацоўшчыкам праекта выяўленых экспертамі неадпаведнасцей ва ўстаноўлены для экспертызы тэрмін. Гэта не вельмі правільна ў адносінах да праекціроўшчыка, ён жа прадстаўляе дакументацыю, узгодненую заказчыкам. Таму ў абгрунтаваных выпадках ідзём насустрач і даём яму магчымасць дапрацаваць праект у працэсе экспертызы пры прыняцці ім рашэння аб прадаўжэнні тэрмінаў правядзення экспертызы да двух месяцаў, - расказаў Віктар Пятруша. - Калі прадаставіць гэту магчымасць прафесійнаму праекціроўшчыку, то максімум на працягу двух месяцаў ён дапрацуе праект і атрымае станоўчае заключэнне. А калі яму вярнуць праект з адмоўным заключэннем, то ён прынясе яго праз 2-3 месяцы, а потым яшчэ месяц пойдзе на экспертызу. Гэта зацягванне працэсу. Цікава, што цяпер і расійская экспертыза стала дзейнічаць падобным чынам".

Адным з важных элементаў у рабоце экспертаў таксама з'яўляецца пацвярджэнне абгрунтаванасці разліку праекціроўшчыкам каштарыснага кошту аб'ектаў - аспект эканамічнай бяспекі. Па выніках першага паўгоддзя 2022 года органы дзяржаўнай будаўнічай экспертызы не пацвердзілі яе абгрунтаванасць на суму $411 млн (у эквіваленце), запатрабаваных праекціроўшчыкам і заказчыкам на будаўніцтва. "Часта мы чуем спекуляцыі накшталт: экспертам трэба толькі зрэзаць бюджэт, яны лічаць кожную капейку. Так кажуць толькі тыя праекціроўшчыкі, якія або не ведаюць сітуацыі, або ім трэба апраўдацца за свае непрафесійныя дзеянні. Мы не ўразаем расход сродкаў на будаўніцтва, а пацвярджаем аб'ектыўнасць каштарыснай дакументацыі ў складзе праекта. Часта праекціроўшчыкі прапускаюць аб'ёмы, прымяняюць няправільныя расцэнкі або банальна дапускаюць арыфметычныя памылкі ў каштарысных разліках. Выпраўленне гэтых памылак, напрыклад, павялічыла каштарысны кошт па выніках экспертызы на $320 млн (у эквіваленце) за 2021 год", - расказаў дырэктар прадпрыемства.

Эксперты аказваюць свой прафесійны ўплыў на дзеянні праекціроўшчыкаў і заказчыкаў па аспекце кошту будаўніцтва, але гэта робіцца (за выключэннем устаранення прамых памылак пры фарміраванні каштарыснай дакументацыі) у асноўным дзякуючы больш эфектыўным і мэтазгодным прапановам па аптымізацыі праектных рашэнняў. "Тут як у жыцці - аднаго і таго ж можна дабіцца рознымі шляхамі і за розныя грошы. Навошта плаціць 10 рублёў, калі за тое ж самае можна аддаць 5?" - сказаў Віктар Пятруша.-0-

Падпісвайцеся на нас у
Twitter
Топ-навіны
Свежыя навіны Беларусі