Мабільная версія
ДЗЯРЖОРГАНЫ

Апошнія навіны
Усе навіны

Беларусь разглядае пытанне ўступлення ў Міжнародную федэрацыю арганічнага сельгасруху

Эканоміка 05.12.2018 | 15:33
Уладзімір Гракун
Уладзімір Гракун

5 снежня, Мінск /Кар. БЕЛТА/. Беларусь разглядае пытанне ўступлення ў Міжнародную федэрацыю арганічнага сельскагаспадарчага руху (IFOAM), паведаміў сёння журналістам намеснік міністра сельскай гаспадаркі і харчавання Уладзімір Гракун у прэс-цэнтры БЕЛТА.

"Разглядаецца пытанне ўступлення ў IFOAM. Гэта важна для прызнання нашых сертыфікатаў у свеце. Мы зацікаўлены ў пастаўках арганічнай прадукцыі на экспарт, а для гэтага прызнанне сертыфікатаў неабходна. Усю інфармацыю аб вытворчасці арганічнай прадукцыі мы стараемся ўніфікаваць у адпаведнасці з еўрапейскімі патрабаваннямі, каб можна было пастаўляць нашу прадукцыю як на рынак краін ЕАЭС, так і на еўрапейскі рынак", - сказаў Уладзімір Гракун.

На пытанне, ці плануецца пастаўляць беларускую арганічную прадукцыю ў Кітай, ён адказаў: "Экспарт будзе залежаць ад попыту. Па заяўцы КНР мы гатовы яе пастаўляць. Але тут трэба абмяркоўваць, у якой менавіта прадукцыі і ў якіх аб'ёмах паставак можа быць зацікаўлены Кітай, якія патрабаванні да яе прад'яўляюцца на кітайскім рынку. Закон аб вытворчасці і абарачэнні арганічнай прадукцыі ў Беларусі ўступае ў сілу праз год, ёсць час для абмеркавання".

Згодна з законам, фінансаванне вытворчасці і абарачэння арганічнай прадукцыі будзе весціся за кошт сродкаў вытворцаў, рэспубліканскага, мясцовых бюджэтаў па дзяржпраграмах, а таксама іншых крыніц, не забароненых заканадаўствам. "У асноўным сёння вытворцы займаюцца вытворчасцю арганічнай прадукцыі раслінаводства - гэта плодаагароднінная прадукцыя, бульба, крупяныя культуры. У Беларусі дзейнічае Дзяржаўная праграма развіцця аграрнага бізнесу на 2016-2020 гады. У ёй ёсць падпраграма, якая прадугледжвае выдзяленне на конкурснай аснове сродкаў для пасадкі садоў, будаўніцтва сховішчаў. Таму заяўнікі маюць магчымасць звяртацца", - адзначыў намеснік міністра.

"Арганічная вытворчасць прадастаўляе шэраг дадатковых магчымасцей для атрымання экалагічных, эканамічных і сацыяльных выгад, - звярнуў увагу намеснік начальніка ўпраўлення біялагічнай і ландшафтнай разнастайнасці галоўнага ўпраўлення рэгулявання абыходжання з адходамі, біялагічнай і ландшафтнай разнастайнасці Мінпрыроды Андрэй Кузьміч. - Правільна арганізаваная арганічная вытворчасць вядзе да аздараўлення стану навакольнага асяроддзя, змяншэння паступлення тэхнагенных хімічных рэчываў у глебу і далей у падземныя і паверхневыя воды. Гэтаму будуць садзейнічаць нормы прынятага закона "Аб вытворчасці і абарачэнні арганічнай прадукцыі", згодна з якім пры вытворчасці арганічнай прадукцыі забараняецца прымяняць хімічныя ўгнаенні і сродкі аховы раслін, іншыя сінтэзіраваныя хімічным шляхам сродкі".

У Нацыянальнай стратэгіі ўстойлівага сацыяльна-эканамічнага развіцця Беларусі на перыяд да 2030 года ў якасці аднаго з галоўных крытэрыяў развіцця сельскай гаспадаркі прадугледжаны рост долі арганічных зямель у агульнай плошчы сельскагаспадарчых зямель да 3-4 працэнтаў да 2030 года. Палажэнні аб неабходнасці развіцця вытворчасці арганічнай прадукцыі змешчаны і ў Дактрыне нацыянальнай харчовай бяспекі Беларусі да 2030 года.

Вытворчасцю арганічнай сельскагаспадарчай прадукцыі ў Беларусі займаюцца больш за 20 суб'ектаў гаспадарання, уключаючы фермерскія і асабістыя падсобныя гаспадаркі, сельскагаспадарчыя і іншыя арганізацыі Брэсцкай, Віцебскай, Гродзенскай, Мінскай і Магілёўскай абласцей. Сем арганізацый акрэдытавана ў Еўрасаюзе па выдачы сертыфікатаў на вытворчасць арганічнай прадукцыі. Сертыфікавана каля 1,5 тыс. га сельскагаспадарчых зямель.

Міжнародная федэрацыя арганічнага сельскагаспадарчага руху (IFOAM) уключае каля 760 арганізацый і аб'яднанняў больш як са 100 краін. Плошча зямель у свеце, сертыфікаваных для вытворчасці арганічнай прадукцыі, за апошнія 10 гадоў павялічылася з 30 млн да 58 млн га. Аб'ём рэалізацыі арганічнай прадукцыі на сусветным рынку вырас у 2,3 раза - да $90 млрд. Асаблівасцю гэтага сегмента рынку з'яўляецца яго стабільна высокі рост - ад 10 да 20 працэнтаў у год. Згодна з экспертнымі ацэнкамі, да 2020 года міжнародны абарот арганічнай прадукцыі павялічыцца да $130 млрд.-0-

Версія для друку
Навіны рубрыкі Эканоміка
Надвор'e
Мінск
Баранавічы
Бабруйск
Барысаў
Брэст
Варшава
Вільнюс
Віцебск
Гомель
Гродна
Жлобін
Кіеў
Ліда
Мінск
Магілёў
Мозыр
Масква
Орша
Полацк
Рыга
Санкт-Пецярбург
Салігорск

Інфаграфіка

Хто часцей за ўсё наведвае Беларусь па бязвізавым рэжыме Паводле даных на 29 лістапада, магчымасцямі 30-дзённага бязвізавага знаходжання ў Беларусі скарысталіся амаль 179 тыс. грамадзян розных краін.