10 студзеня, Мінск /Кар. БЕЛТА/. Урачыстая цырымонія ўзнагароджвання пераможцаў літаратурнага конкурсу "Беларускі салавей", прысвечанага 135-годдзю з дня нараджэння Змітрака Бядулі, пройдзе 18 студзеня ў галерэі "Лабірынт" Нацыянальнай бібліятэкі Беларусі, паведамілі БЕЛТА ва ўстанове культуры.
Літаратурны конкурс праходзіў у час праекта "На хвалі часу, у плыні жыцця" і быў аб'яўлены восенню мінулага года Нацыянальнай бібліятэкай пры ўдзеле газеты "Літаратура і мастацтва", "Настаўніцкай газеты", часопіса "Бярозка", Вялікага тэатра, Беларускага дзяржаўнага акадэмічнага тэатра юнага гледача і іншых.
"У праекце прынялі ўдзел 827 чалавек. Конкурс стаў папулярным сярод шырокай аўдыторыі дзяцей і дарослых з розных куткоў Беларусі. Ён нават прыцягнуў увагу замежных удзельнікаў", - расказалі ў бібліятэцы.
Пачэсным госцем мерапрыемства стане сын Змітрака Бядулі Яўхім Плаўнік. Ён падтрымліваў творчую ініцыятыву, сачыў за развіццём конкурсу і знаёміўся з работамі ўдзельнікаў. "Віншаванні ад такога цікавага чалавека стануць адным з лепшых і найбольш каштоўных падарункаў для гасцей і ўдзельнікаў урачыстасці", - упэўнены ва ўстанове.
Пераможцаў чакаюць памятныя падарункі і віншаванні ад інфармацыйных партнёраў конкурсу. Пасля мерапрыемства ўдзельнікаў чакае экскурсія па бібліятэцы.-0-
