9 верасня, Мінск /Кар. БЕЛТА/. Нацыянальны акадэмічны канцэртны аркестр Беларусі 11 верасня прыме ўдзел ва ўрачыстым адкрыцці XIII Рэспубліканскага фестывалю нацыянальных культур, паведаміў карэспандэнту БЕЛТА мастацкі кіраўнік калектыву Міхаіл Фінберг.
Каля ратушы на плошчы Свабоды ў Мінску заслужаны калектыў прадставіць мінчанам і гасцям сталіцы новую праграму, у аснове якой будуць песні Яўгена Глебава, Уладзіміра Алоўнікава, Ігара Лучанка і іншых беларускіх кампазітараў. Іх выканаюць салісты аркестра - лаўрэаты міжнародных і рэспубліканскіх конкурсаў заслужаная артыстка Беларусі Наталля Тамела, Таццяна Глазунова, Галіна Грамовіч, Алеся Дзержавец, Дзмітрый Качароўскі, Руслан Мусвідас, Аляксандр Салаўёў, Яўген Цымбаліст і Ягор Шаранкоў.
"Пройдзе вялікі святочны канцэрт. Мы нагадаем гледачам тыя творы, якія ўжо шмат гадоў не гучаць, але з'яўляюцца шэдэўрамі беларускай музыкі. У першую чаргу мы ўспомнім музыку Ігара Лучанка. Яго песня "Я прыйду" з'яўляецца сімвалам горада Мінска. Яе выканае Ягор Шаранкоў. У нашых артыстаў будзе магчымасць чарговы раз падзякаваць Ігару Лучанку за тую багатую спадчыну, якую ён пакінуў нам", - адзначыў Міхаіл Фінберг.-0-
