10 сакавіка, Брэст /Кар. БЕЛТА/. Брэсцкая абласная бібліятэка імя М.Горкага рыхтуе да запуску новы культурна-адукацыйны праект "Тerra incognita: пераход у эпоху", паведамілі карэспандэнту БЕЛТА ва ўстанове культуры.
Запланаваны цыкл музейна-бібліятэчных заняткаў, на якія можа запісацца любы жадаючы. У красавіку пройдуць сустрэчы на тэму "Кнігі знакамітых еўрапейскіх друкарань XVI-XVII стагоддзяў". У верасні супрацоўнікі аддзела рэдкай кнігі раскажуць пра кніжныя скарбы XVII стагоддзя. Лістападаўскі цыкл прысвечаны кніжным помнікам XVIII стагоддзя. Чытачоў чакае інтэрактыўная праграма культурнага вывучэння адпаведнай эпохі. У залежнасці ад спецыфікі аўдыторыі, узросту і колькасці ўдзельнікаў падача матэрыялу будзе адрознівацца. Запісвацца для ўдзелу ў занятках трэба загадзя.
Таксама новы праект уключае серыю навукова-папулярных відэаролікаў, прысвечаных выдатным выдаўцам, друкарням, асобным кнігам і аўтарам. Першы ролік ужо можна ўбачыць на афіцыйным сайце бібліятэкі і яе старонках у сацыяльных сетках. Ён прысвечаны аднаму з самых вядомых кнігадрукароў Еўропы - нідэрландскаму друкару Крыстафу Плантэну. У аддзеле рэдкай кнігі бібліятэкі захоўваюцца два выданні Плантэна, надрукаваныя ў Антверпене ў 1629 і 1664 гадах.
Ужо гатовы і другі відэаролік. Ён прысвечаны выдавецтву Эльзевіраў ў Амстэрдаме - сямейства галандскіх друкароў, якое займала вядучае, а часам і дамінуючае становішча ў еўрапейскім кнігадрукаванні XVII стагоддзя. Цяпер у рабоце знаходзіцца трэці фільм пра італьянскага выдаўца, гісторыка і літаратара эпохі Адраджэння Алесандра Гваньіні і яго "Хроніку Еўрапейскай Сарматыі".
"Гэта асветны праект, з дапамогай якога мы хочам папулярызаваць фонды нашай бібліятэкі, прыцягнуць да яе ўвагу рэальных чытачоў. Праект мае доўгатэрміновы характар і вялікі патэнцыял развіцця, мы маем намер дапаўняць яго новымі фарматамі мерапрыемстваў", - адзначылі ў бібліятэцы.
Фонд аддзела рэдкай кнігі абласной бібліятэкі змяшчае каля 3 тыс. экзэмпляраў каштоўных, рэдкіх і рарытэтных выданняў. Сярод іх старадрукаваныя кнігі XVI-XVIII стагоддзяў, у тым ліку арыгінальны фрагмент Брэсцкай Бібліі - помніка кніжнай культуры Беларусі XVI стагоддзя, набыты ў 2013 годзе. Жамчужынамі фонду з'яўляюцца рукапісныя дакументы XVIII - пачатку XX стагоддзяў, а таксама факсімільныя, рэпрынтныя, мініяцюрныя і малафарматныя выданні.-0-
