7 жніўня, Мінск /Кар. БЕЛТА/. Прэзідэнт ЗША Дональд Трамп заявіў, што тыя прадпрымальнікі, якія працуюць з Іранам, не змогуць адначасова весці бізнес са Злучанымі Штатамі пасля аднаўлення Вашынгтонам санкцый супраць Тэгерана. Аб гэтым ён напісаў на сваёй асабістай старонцы ў Twitter, паведамляе ТАСС.
"Санкцыі супраць Ірана былі афіцыйна ўведзены. Гэта санкцыі, якія наносяць найбольшы ўрон з усіх, калі-небудзь уведзеных, і ў лістападзе яны будуць падняты на новы ўзровень. Ніхто, хто вядзе бізнес з Іранам, не будзе весці бізнес са Злучанымі Штатамі. Я прашу аб міры ва ўсім свеце, не менш!" - заявіў Дональд Трамп.
У маі прэзідэнт ЗША Дональд Трамп аб'явіў аб выхадзе з Сумеснага ўсёабдымнага плана дзеянняў па іранскай ядзернай праграме (СУПД) і абяцаў не толькі вярнуць старыя, але і ўвесці новыя санкцыі ў адносінах да Ірана.
Першая частка амерыканскіх санкцый аднавіла дзеянне ў ноч на 7 жніўня. Гэтыя абмежавальныя меры ахопяць, у прыватнасці, аўтамабілебудаўнічы сектар Ірана і куплю-продаж золата і шэрага металаў. Астатнія санкцыі ўступяць у сілу 5 лістапада. Яны будуць закранаць перш за ўсё энергетычную галіну Ірана, здзелкі, якія адносяцца да нафты, а таксама транзакцыі з цэнтральным банкам Ірана.
Еўрасаюз выказаў шкадаванне ў сувязі з выхадам ЗША з СУПД і аднаўленнем амерыканскіх санкцый у адносінах да Ірана. Еўрасаюз таксама з 7 жніўня ўвёў у дзеянне еўрапейскі блакіруючы рэгламент, які аб'яўляе недзеючымі на сваёй тэрыторыі экстэрытарыяльныя санкцыі ЗША ў адносінах да Ірана, забараняе еўрапейскім кампаніям іх выконваць, а таксама забараняе выкананне любых рашэнняў замежных судоў, прынятых на падставе гэтых санкцый.
Як заявіў кіраўнік МЗС ФРГ Хайка Маас, ЕС будзе абараняць свае фірмы, якія ажыццяўляюць здзелкі з Іранам, у абмен чакае, што Тэгеран прадоўжыць выконваць абавязацельствы ў рамках пагаднення па атамнай праграме.
Захаваць ядзерную здзелку з Іранам, нягледзячы на байкот ЗША, таксама паабяцаў кіраўнік МЗС Францыі Жан-Іў Ле Дрыян. "Еўропа прытрымліваецца адзінай пазіцыі па гэтым пытанні", - заявіў дыпламат.
Вярхоўны прадстаўнік ЕС па замежных справах і палітыцы бяспекі Федэрыка Магерыні раней таксама заяўляла, што ЕС будзе прадаўжаць развіваць і нарошчваць сваё эканамічнае супрацоўніцтва з Іранам, нягледзячы на аднаўленне дзеяння санкцый ЗША.
Напярэдадні, 6 жніўня, намеснік афіцыйнага прадстаўніка генеральнага сакратара ААН Фархан Хак заклікаў усіх удзельнікаў СУПД па іранскай ядзернай праграме захаваць пагадненне, нягледзячы на ўступленне ў сілу санкцый ЗША ў адносінах да Тэгерана. Ён таксама дадаў, што генеральны сакратар арганізацыі Антоніу Гутэрыш прадаўжае разглядаць СУПД як дыпламатычнае дасягненне і выказвае падтрымку ўсім дзяржавам, якія ўдзельнічаюць у пагадненні.
СУПД быў заключаны пастаяннай пяцёркай Савета Бяспекі ААН і Германіяй з Іранам у 2015 годзе. Гэта дамоўленасць абмяжоўвала ядзерныя распрацоўкі Тэгерана ў абмен на адмену санкцый Савета Бяспекі ААН і аднабаковых абмежавальных мер, уведзеных у свой час ЗША і ЕС.-0-
