26 ліпеня, Пекін /Кар. БЕЛТА/. Ініцыятыва Кітая "Адзін пояс і адзін шлях" можа ўнесці вялікі ўклад у дасягненне мэт устойлівага развіцця ААН да 2030 года. Аб гэтым заявіў сёння намеснік Генеральнага сакратара ААН па эканамічных і сацыяльных пытаннях Ву Ханбо, выступаючы на Форуме супрацоўніцтва СМІ ў Пекіне, перадае карэспандэнт БЕЛТА.
"У канцэпцыі ўстойлівага развіцця, разлічанай да 2030 года, змешчана 17 мэт і ставіцца беспрэцэдэнтна высокая планка, фактычна акрэсліваючы шлях далейшага развіцця міжнароднай супольнасці. Адна з галоўных перадавых задач для краін - членаў Арганізацыі Аб'яднаных Нацый - устараніць такія з'явы, як беднасць і голад. Мы поўныя рашучасці дабіцца гэтага ў бліжэшым будучым", - падкрэсліў Ву Ханбо.
Паводле яго слоў, поспех у дасягненні мэт у многім залежыць ад намаганняў нацыянальных урадаў і розных супольнасцей. "Лічым, што ініцыятыва "Адзін пояс і адзін шлях", якая ахоплівае Еўропу, Азію і Афрыку, будзе адыгрываць тут значную ролю. Безумоўна, праект, ініцыіраваны Кітаем, і мэты ўстойлівага развіцця да 2030 года адрозніваюцца сваім кантэкстам. Але пры гэтым яны маюць нямала агульных рыс і каштоўнасцей, сярод якіх мір, адкрытасць, інклюзіўнасць, узаемаразуменне", - дадаў намеснік генеральнага сакратара ААН.
У Пекіне праходзіць Форум супрацоўніцтва СМІ "Адзін пояс і адзін шлях", які сабраў больш за 200 дэлегатаў вядучых сродкаў масавай інфармацыі са 101 краіны свету.-0-