29 жніўня, Масква /БЕЛТА - ТАСС/. Прэм'ер-міністр Расіі Дзмітрый Мядзведзеў падпісаў пастанову аб адмене забароны на чартарныя паветраныя перавозкі паміж РФ і Турцыяй. Адпаведны дакумент размешчаны на сайце кабміна.
Кіраўнік урада даручыў "прыняць дадатковыя меры, накіраваныя на забеспячэнне транспартнай (авіяцыйнай) бяспекі пры ажыццяўленні рэгулярных паветраных зносін з Турэцкай Рэспублікай".
Авіяперавозчыкам, якія выконваюць чартарныя рэйсы паміж Расіяй і Турцыяй, таксама рэкамендавана забяспечыць дадатковыя меры бяспекі.
У сваю чаргу авіякампаніі пачалі падачу заявак у Расавіяцыю на ажыццяўленне нерэгулярных палётаў у пункты Турэцкай Рэспублікі, паведаміў міністр транспарту РФ Максім Сакалоў.
На думку прэс-сакратара Расійскага саюза туріндустрыі (РСТ) Ірыны Цюрынай, кошт турпакетаў у Турцыю пасля зняцця абмежавання на выкананне чартарных авіяпералётаў знізіцца на 20-30 працэнтаў. "Мяркуецца, што на 20-30 працэнтаў чартарная перавозка знізіць кошт турпакетаў у Турцыю, але трэба разумець, што гэты напрамак ужо мала каго цікавіць, таму што там застаецца два месяцы - верасень і кастрычнік - час, калі яшчэ там цёпла, можна купацца. А вось для Егіпта кастрычнік - гэта высокі сезон", - сказала Цюрына.
Паводле слоў Ірыны Цюрынай, "попыт на Турцыю на бліжэйшыя два месяцы будзе, але ён не будзе ажыятажным - асноўная маса турыстаў з дзецьмі ўжо вяртаецца з адпачынку, усе чакаюць пачатку навучальнага года". "Тураператары самалёты знойдуць, змогуць іх пераарыентаваць з адных напрамкаў на іншыя. На гэта спатрэбіцца амаль тыдзень. Таксама прыкладна тыдзень патрэбны на продаж тураў", - дадала прэс-сакратар РСТ.-0-
