29 жніўня, Мінск /Кар. БЕЛТА/. Колькасць загінулых пасля ўрагану "Харві", які бушаваў у амерыканскім штаце Тэхас, узрасла да 14 чалавек. Аб гэтым паведамляе Fox News, спасылаючыся на даныя мясцовых улад.
Адзначаецца, што колькасць загінулых можа ўзрасці.
У гэты час у горадзе Х'юстан яшчэ шмат затопленых тэрыторый, канчаткова ацаніць наступствы разгулу стыхіі можна будзе, калі вада сыдзе. Граданачальнік Х'юстана Сільвестр Цёрнер заявіў, што ў цэнтрах часовага пражывання людзей і прытулках размешчаны больш за 6 тыс. чалавек.
Між тым губернатар штата Тэхас Грэг Эбат заклікаў да мабілізацыі 12 тыс. рэзервістаў нацыянальнай гвардыі. Яны будуць аказваць дапамогу пацярпелым ад стыхіі, а таксама весці пошук магчымых ахвяр "Харві".-0-