27 ліпеня, Мінск /Кар. БЕЛТА/. Іспанскі спартыўны функцыянер Анхель Марыя Вільяр заявіў, што ідзе ў адстаўку з пасады віцэ-прэзідэнта Саюза еўрапейскіх футбольных асацыяцый (УЕФА). Адбылося гэта з-за абвінавачанняў у карупцыі і арышту. Аб гэтым паведамляе ТАСС са спасылкай на прэс-службу УЕФА.
Паліцэйскія раней, 18 ліпеня, правялі вобыск у офісе Каралеўскай іспанскай футбольнай федэрацыі. Анхель Марыя Вільяр з'яўляецца прэзідэнтам гэтай структуры. У ходзе аперацыі былі затрыманы не менш за 10 чалавек, у тым ліку Анхель Марыя Вільяр, яго сын, а таксама віцэ-прэзідэнт федэрацыі па пытаннях эканомікі Хуан Пардон. Затрыманых падазраюць у крадзяжы 45 млн еўра.
Падазроныя знаходзяцца пад вартай без права выхаду пад заклад на час расследавання.
Анхель Марыя Вільяр вылучаўся на пасаду прэзідэнта УЕФА ў мінулым годзе, але потым зняў сваю кандыдатуру з выбараў.-0-
