28 лістапада, Мінск /Кар. БЕЛТА/. Тэнісістка Вікторыя Азаранка рассталася са сваім трэнерам Майклам Джойсам, паведамляе карэспандэнт БЕЛТА.
Беларуска і адзін з лепшых амерыканскіх спецыялістаў, які працаваў раней з Марыяй Шарапавай і Слоўн Стывенс, пачалі супрацоўніцтва ў пачатку гэтага года. "Віка - неверагодна таленавітая тэнісістка. Вельмі рады яе вяртанню ў тэніс, але пры гэтым я падтрымліваю і паважаю тое, што яна паставіла сваю сям'ю на першае месца. З глыбокім шкадаваннем прыняў рашэнне рухацца далей у сваёй трэнерскай кар'еры, а Азаранка будзе разбірацца з асабістым жыццём. З нецярпеннем буду чакаць яе хутчэйшага вяртання на корт. Жадаю ёй удачы", - расказаў аб прычынах свайго развітання Майкл Джойс.
Паводле інфармацыі СМІ, трэнер прадоўжыць работу з брытанскай тэнісісткай Ёханай Конта.
Вядучая беларуская тэнісістка не выступае на афіцыйных турнірах з ліпеня бягучага года. Праблемы ўзніклі з-за судовай справы з бацькам яе дзіцяці. Вікторыя Азаранка плануе вярнуцца ў прафесійны тур у студзені, прыняўшы ўдзел у турніры ў Оклендзе.-0-
