1 ліпеня, Мінск /Кар. БЕЛТА/. Футбалісты мінскага "Дынама" паспяхова пачалі выступленне ў першым кваліфікацыйным раўндзе Лігі Еўропы, паведамляе карэспандэнт БЕЛТА.
30 чэрвеня падапечныя Вука Рашавіча на полі мінскага стадыёна "Трактар" выйгралі ў "Спартака" з Юрмалы з лікам 2:1 (1:0). Першая палавіна гульні прайшла з перавагай гаспадароў, але большасць іх атак заканчваліся ўдарамі міма цэлі. Толькі на 18-й мінуце сустрэчы Арцём Быкаў змог паразіць вароты Уладзіслава Куракіна. Госці ў першым тайме мелі адну стапрацэнтную магчымасць зраўнаваць лік, але мяч не трапіў у вароты Сяргея Ігнатовіча, ён замяніў на апошнім рубяжы дынамаўскай абароны Аляксандра Гутара, які перайшоў у расійскі "Арэнбург". У другой палавіне сустрэчы спартакаўцы пачалі гуляць больш актыўна, прымусіўшы мінчан думаць толькі аб абароне. Вынікам перавагі гасцей стаў гол Данііла Улімбашава, які вызначыўся на 80-й мінуце. На шчасце для дынамаўцаў, літаральна праз мінуту груба памыліўся галкіпер латвійскай каманды, і Арцём Быкаў, аформіўшы галявы дубль, зноў вывеў наперад сваю каманду. Паядынак у адказ адбудзецца 7 ліпеня на арэне латвійскага клуба.
Пераможца дынамаўска-спартакаўскага процістаяння ў другім раўндзе кваліфікацыі сустрэнецца з лепшай камандай пары "Сэнт-Патрыкс" (Ірландыя) - "Жэнес" (Люксембург). Іх першая сустрэча ў Дубліне завяршылася мінімальнай перамогай ірландскага клуба - 1:0.-0-
