29 жніўня, Мінск /Кар. БЕЛТА/. Футбалісткі "Мінска" выйшлі ў плэй-оф жаночай Лігі чэмпіёнаў УЕФА, паведамляе карэспандэнт БЕЛТА.
Каманда Юрыя Малеева ў заключным матчы 6-й кваліфікацыйнай групы ў славенскай Любляне згуляла ўнічыю са швейцарскім "Цюрыхам" - 0:0 і заняла першае месца. На старце турніру чэмпіёнкі Беларусі разграмілі мальтыйскую "Біркіркару" - 8:0, а потым не пакінулі шанцаў славенскай "Алімпіі", атрымаўшы перамогу з лікам 5:0. Лепшымі снайперамі мінчанак на міні-турніры ў сталіцы Славеніі сталі Ганна Піліпенка і Таміла Хіміч, якія забілі па 4 галы. Падагульняючае становішча каманд: "Мінск" - 7 ачкоў (розніца мячоў - 13-0), "Цюрых" - 7 (7-1), "Алімпія" - 3 (2-7), "Біркіркара" - 0 (0-14).
Спартсменкі ФК "Мінск" трэці раз запар выйшлі ў 1/16 фіналу чэмпіёнскай Лігі, праўда, ім яшчэ не ўдавалася прабіцца ў 1/8 фіналу. Пра сваіх бліжэйшых сапернікаў яны даведаюцца ў пятніцу, 1 верасня, пасля жараб'ёўкі, якая адбудзецца ў штаб-кватэры УЕФА ў швейцарскім Ньёне.
Матчы першага раўнда плэй-оф пройдуць 4-5 і 11-12 кастрычніка. Фінальны паядынак жаночай Лігі чэмпіёнаў адбудзецца 24 мая 2018 года на стадыёне імя Валерыя Лабаноўскага ў Кіеве.-0-
