13 кастрычніка, Мінск /Кар. БЕЛТА/. Маладыя беларусы на XIX Сусветным фестывалі моладзі і студэнтаў (СФМС) у Сочы выступяць у ролі паслоў сваёй краіны. Такое меркаванне выказаў намеснік прэм'ер-міністра Васіль Жарко на сустрэчы з дэлегатамі Беларусі на СФМС, перадае карэспандэнт БЕЛТА.
Віцэ-прэм'ер адзначыў, што дэлегатам давядзецца выканаць на фестывалі важную місію - расказаць пра Беларусь, краіну, якая адкрыта для сумесных праектаў, гатова і далей актыўна ўдзельнічаць у развіцці дыялогу паміж дзяржавамі ўсяго свету. Ён падкрэсліў, што маладыя людзі, якія адпраўляюцца на міжнародны фестываль у Сочы, - паслы Беларусі на гэтым мерапрыемстве. Яны змогуць расказаць сваім равеснікам з іншых краін пра тое, якія адукацыйныя магчымасці ёсць у беларускай моладзі, пра свае навуковыя адкрыцці, актыўны ўдзел у палітычным і грамадскім жыцці.
Васіль Жарко ўручыў прадстаўнікам дэлегацыі сцяг Беларусі, які яны адвязуць на фестываль у Сочы.
Першы сакратар ЦК ГА "БРСМ", намеснік кіраўніка дэлегацыі Андрэй Белякоў у сваю чаргу падкрэсліў, што тыя 300 чалавек, якія адправяцца 14 кастрычніка ў Сочы, змогуць дастойна прадставіць на фестывалі Беларусь як прыгожую, маладую, незалежную краіну, умацаваць яе імідж на міжнароднай арэне.
У гэтым дапаможа маштабная выстаўка, на якой будуць прэзентаваны дасягненні Беларусі ў розных галінах - ад прамысловасці, адукацыі да культуры. Акцэнт у экспазіцыі будзе зроблены таксама на падтрымцы моладзі, яе ўдзеле ў грамадскім жыцці, турыстычным патэнцыяле краіны. Яна будзе прадстаўлена яшчэ і як гаспадыня II Еўрапейскіх гульняў 2019 года, чэмпіянату свету па хакеі, які ў 2021 годзе будзе прымаць разам з Латвіяй.
Праграма фестывалю абяцае быць насычанай. Беларуская моладзь прыме актыўны ўдзел у дыскусійных, культурных, забаўляльных, спартыўных і іншых мерапрыемствах. Кожны дзень у адпаведнасці з традыцыямі фестывальнага руху будзе прысвечаны аднаму з макрарэгіенаў планеты, яго спецыфіцы і ключавым сферам. Акрамя таго, кожнаму дню будзе прысвоена скразная тэма, якая аб'яднае панэльныя дыскусіі, канферэнцыі і семінары. Сярод такіх тэм - культурнае ўзаемадзеянне, міжнародная бяспека, адукацыя, навука і навакольнае асяроддзе, IT. Будуць закранацца таксама пытанні, звязаныя з занятасцю моладзі, праблемамі экалогіі.
СФМС-2017, які пройдзе 14-22 кастрычніка, абяцае стаць буйнейшай падзеяй у сферы міжнароднага маладзёжнага ўзаемадзеяння. Плануецца, што ўдзел у ім прымуць больш за 20 тыс. чалавек са 150 краін. Сімвалам фестывалю выбраны каляровы рамонак, што азначае пераемнасць традыцый, сувязь пакаленняў, мір і адзінства ўсёй сусветнай супольнасці. Галоўным элементам сталі каляровыя пікселі як знак з'яднанасці моладзі ўсяго свету ў інфармацыйную эпоху. Фестываль прызначаны кансалідаваць моладзь, садзейнічаць развіццю міжнацыянальнага і міжкультурнага ўзаемадзеяння.-0-
