22 мая, Мінск /Кар. БЕЛТА/. Беларусь плануе ўдасканаліць заканадаўства ў галіне энергазберажэння і энергаэфектыўнасці. Аб гэтым паведаміў старшыня Савета Рэспублікі Міхаіл Мясніковіч сёння на сустрэчы са старшынёй Камітэта рэгіёнаў ЕС Марку Марккула (Фінляндыя), перадае карэспандэнт БЕЛТА.
Паводле слоў Міхаіла Мясніковіча, тэма энергазберажэння і энергаэфектыўнасці, якая абмяркоўвалася сёння ў Мінску на пасяджэнні Бюро Канферэнцыі мясцовых і рэгіянальных улад краін "Усходняга партнёрства", а таксама будзе разглядацца на саміце "Усходняга партнёрства" ў Бруселі, вельмі актуальная. "Асабліва для нас, краін, якія не валодаюць моцнымі сыравіннымі энергетычнымі рэсурсамі", - заўважыў спікер.
"У Беларусі створана пэўная сістэма, яна працуе, але мы лічым, што гэтага недастаткова, і ў нашы планы ўваходзіць удасканаленне заканадаўства па пытаннях энергазберажэння і энергаэфектыўнасці", - сказаў старшыня верхняй палаты парламента.
У цэлым спікер адзначыў, што Беларусь надае вялікае значэнне супрацоўніцтву з Еўрапейскім саюзам. "Сустаршынства нашай краіны ў Канферэнцыі мясцовых і рэгіянальных улад краін "Усходняга партнёрства" і правядзенне пасяджэння бюро ў Мінску ў пэўнай ступені замацоўваюць пазітыўныя змяненні ў адносінах, якія назіраюцца апошнія гады. Лічым, што гэта толькі пачатак вялікага шляху, і мы зацікаўлены ў далейшым развіцці адносін з Еўрасаюзам", - заявіў Міхаіл Мясніковіч.
Што датычыцца рэгіянальнай палітыкі і развіцця мясцовага самакіравання, ён пацвердзіў, што ў Беларусі гэтай тэме ўдзяляецца асаблівая ўвага. Спікер звярнуў увагу, што рэгіёны краіны маюць сур'ёзныя правы ў бюджэтнай палітыцы, у пытаннях уласнасці і выбарчага права. Акрамя таго, захоўваецца базавы падыход Еўрапейскай хартыі мясцовага самакіравання.
Сёння ў Мінску прайшло пасяджэнне Бюро Канферэнцыі мясцовых і рэгіянальных улад краін "Усходняга партнёрства". Беларусь прадстаўляе Савет па ўзаемадзеянні органаў мясцовага самакіравання пры верхняй палаце парламента.У кастрычніку 2016 - верасні 2017 года Беларусь выступае сустаршынёй Канферэнцыі мясцовых і рэгіянальных улад краін "Усходняга партнёрства".-0-
